18/10/2026
- EK IS WAT EK IS: ’n Unieke geestelike joernaal -
Marius en Pauline Schoombie is die skrywers van ’n unieke geestelike joernaal wat by die feesmark te koop sal wees. Die skrywers hoop dat die joernaal ’n tipe “handleiding” sal wees wat mense sal help om ’n bietjie stadiger te leef, tyd saam met God deur te bring en op ’n nuwe en vars manier met hul geloof om te gaan.
Die joernaal bevat oordenkings, soms vrae, asook Skrifgedeeltes wat by die kunste aansluit, en dan ’n uitnodiging om self iets te doen of te maak. Dit beteken jy kan skryf, teken, skeur, plak, met modder of koffie werk, of eenvoudig op regtig énige manier elke bladsy benut.
Maak seker dat jy vanjaar dié besondere joernaal, vol tekste, tekeninge en ’n hele klomp kreatiewe idees, by die feesmark onder die oë kry. Die boek word in Saal F, die groot tent wat parallel met Mountain Viewrylaan staan, uitgestal.
