25/06/2024
ANG KWARTA PARA LANG SA "FLAVOR UG FAVOR"
Nanginabuhi ra gyod ta para sa uban.
Kabantay mo, nga inigkadawat nato sa atong kwarta nga hinagoan, kadyot ra kaayo ni mopuyo sa atong pitaka, mobalhin na nig puyo sa laing pitaka. Kato pong pitakaha nga nakadawat sa imong kwarta, kadyot ra pod tong mopuyo didto, mobalhin na pod to sa laing pitaka. Laktod pagka sulti maglatagaw ra ang kwarta.
Ngano mana?
Ang pinakamubong tubag kay: "Ekonomiya."
ANG KWARTA PARA LANG SA "FLAVOR UG FAVOR"
Ang kwarta gi desinyo lang para malipay ta sa duha sa pinakadagkong panginahanglan sa tawo: Flavor ug Favor.
1. Flavor- Inigkadawat nato sa atong kwarta, mang grocery dayon ta. Palit tag bugas, canned goods, karne, isda, utanon, prutas, lamas, gatas, sugar, asin. Kon naay sobra, adto padulong sa Jollibee, Mang Inasal, Chowking, Jonies, Dimsum, Chicken Deli ug KFC.
Kon dakog sobra labyan rang mga fast foods adto sa Cafe Laguna, Lantaw, Chobi-Chobi, Matsunoya, Tim Ho Wan, Zubuchon, Big J, Lemon Grass. Naa pay lami sa Amethyst Hotel atong migo ang Chef didto.
Kon daghan gyod ug kwarta adto dayon sa Vikings, Buffet 101, Feria sa Radisson, Cafe Bai, Seafood Paradise, Yakimix, Tides sa Shangrila, Sunset Bar sa Dusit Thani, Cocina sa Marco Polo ug 5 Cien sa Sheraton.
Kon pawala sa duka aw sa mga Coffee shops. Coffee Ben and Tea Leaf, Coffee Project, Toms n Toms, Bo's Coffee, Dragonfly, Miau Cafe ug uban pa Kon alanginin sa kwarta naa man poy Cafe @39.
2. Favor- Kon naa kay katabang imong kwarta padulong sa iyang pitaka. Paayo sa imong motor, paayo sa imong sakyanan. Gas sa imong sakyanan. Para sa panday nga nag-ayo sa atop nga mitulo pag-ulan. Bayad sa koryente, bayad sa tubig, bayad sa internet, bayad sa load. Bayri pod imong gi-utangan. Palit ticket sa efflane ug dapor kay molaag sa laing lugar. Palit ug Dorcas nga T Shirt. Ug labaw sa tanan hatag ta sa Worldwide Work.
UNSAY MAHITABO KON IMONG PRISOHON IMONG KWARTA SA IMONG PITAKA O SA IMONG BANKO?
Kon kakita mog tawong gusto gyod magtigom ug kwarta, panid-i, mao ning klaseha sa tawo nga mahadlok pod mogasto. Maguol ni kon maibanan bisag gamay iyang tinigom. Niwang ang lawas kay di man mopalit ug healthy nga pagkaon kay mahal daw. Dili pod ni malipayon kay di mani ganahan manghatag ug di pod ni ganahan maglaag kay hadlok makuhaan ang tinigom. Boxer ni dili karatecian.
Nganong kuyaw kaayo ni?
Kay dili molihok ang ekonomiya. Ug ang pinakakuyaw mao ning na rekord sa Lucas 12:20 kini nag-ingon:
"Apan giingnan siya sa Diyos, ‘Ikaw nga dili makataronganon, karong gabii ila kang patyon."
Ka maayo ra ba gyong maniid sa mga tulisan karon. Unya kay hi tech naman ta karon, kadaghang hacker sa kalibotan. Imong tinigom sa banko, kay naka click man kag link, kay abi nimog mapun-an imong kwarta, na hack na hinuon, ug sa kalit lang nibalhin sa account sa hacker imong wawart. Siya na poy mogasto ato kay wala man nimo gastoha.
IMO RANG BIYAAN IMONG WAWART
Kining Bibliya, reality talk gyod ni. Imong kwarta nga pwerting daghana, biyaan ra. Mao ni ang giingon sa Salmo 49:17 -
"Kay dihang mamatay siya, wala siyay madala. Dili mouban kaniya ang iyang mga bahandi."
Sakto kaayo, ang atong kwarta nga hinagoan, para ra gyod sa uban. Labi na ihatag nato sa pagpalampos sa pinaka importanteng buluhaton sa tibuok kalibotan.
Nakapamalandong gyod ko karon.
