09/02/2026
💔
عشر سنين… مو بس شغل وكراسي وطاولات…
عشر سنين مرو من العمر، من الوجع، من الضحك، من الحب من التعب، من الحرب، من الذكريات يلي ما بتنسى،
ورغم كلشي ضلينا واقفين.
عشر سنين كانوا أكتر من مطعم و كافيه. كانوا بيت، كانوا حضن، كانوا شاهدين على ضحكاتنا، دموعنا، حبنا، زعلنا، مصالحاتنا، وحتى على اللحظات يلي ما كان إلها اسم غير إنها “الصدق والأمان”
بالنسبة الي ايموجي ما كانت بس قعدة… كانت حياة كاملة.
ناس التقت، ناس اتعرفت , ناس حبت وضحكت ,و ناس بكت، وناس افترقت .
ناس تزوجت بعد أول فنجان قهوة هون، وناس بلشت كلماتها باستاذ وانتهت بحبيبي .. وناس طلعت من باب المحل وهي محبطة بس كانت ترجع لهون لان في دفى غريب…..
هون تسطرت اجمل علاقات الحب بمعانيه ، كل زاوية وكل طاولة وكل كرسي بتحكي حكاية .
اليوم مو عم سكر محل… اليوم عم ودّع قطعة من روحي وللاسف وانا بعيد
بلحظة معينة مر عليي شريط ذكريات من ضحكات العالم والشدة وطاولة الزهر والعصبية والرواق .
اليوم عم نسكّر الباب… بس الذكريات ما بتتسكر .
( #ايموجي) رح يضل اسمو محفور بقلبي وبقلب كل شخص فات هون . وإذا المكان انتهى… الإحساس يلي عطانا ياه مستحيل بينتهي.
شكراً لكل شخص مرّ من هون. لكل كلمة حلوة، لكل دعم، لكل لحظة صدق. كنتوا السبب إنو هالمكان يعيش عشر سنين… وكنتوا السبب إنو يضل عايش جواتنا.
شكراً لكل موظف اشتغل هون يوم أو سنين. كل واحد منكن ترك بصمته، وكل واحد كان سبب إنو هالمكان يكون دافي متل ما عرفتو.
إنتو ما كنتوا فريق عمل، إنتو كنتوا روح المكان وكنتو اخواتي ,وشركاء حقيقين انتو كنتو العيلة الحلوة و بدون تعبكم ابتسامتكم ، وصبركم ما كان ايموجي عاش عشر سنين , تعبنا ضحكنا وكبرنا سوا ورح يضل اسمكون محفور بكل زاوية بهالمكان …
9/2/2026___________20/2/2016
💔
