Lina’s Helo kitchen

12/12/2018

خضار متبلة بشوية زيت زيتون + ملح + فلفل أسود + ثوم بودرة + بصل بودرة + اوريغانو دخلتها الفرن ٢٥ دقيقة مولع عليها من فوق ومن تحت بدون تغطاية 🥕🥔

12/12/2018

20/11/2018

حراق إصبعه 😋👌🏼

العجينة: كوبين طحين + ملح + ماء حسب الحاجة
المقادير: كوب ونص عدس بني + 3 بصل مفروم شرايح + ١ كوب عصير تمر هندي + 5 حبات ثوم مهروس + نص كوب كزبرة خضرة مفرومة + ملعقة دبس رمان + ملعقة صغيرة كمون مطحون + زيت زيتون + ملح ( أو مكعب ماجي )
للتزيين : رمان + كزبرة مفرومة +خبز مقطع ومقلي + بصل مقلي

الطريقة :
نعجن العجينة ونغطيها ترتاح نص ساعة نسلق العدس بعد غسله ونضيف عليه الكمون والملح بس يغلي نضيف التمر الهندي ودبس الرمان نفرد العجينة بالشوبك بشكل رغيف كبير ورقيق ونقطعه مربعات صغيرة ورفيعة نضيف مكعبات العجينة للحراق اصبعه ونحرك بمقلاة على جنب نضع زيت الزيتون مع البصل الشرايح ليتحمر ويقرمش نضيف نصف كميه البصل للعدس ونترك النص التاني للزينة
بنفس المقلاة نحمر الثوم والكزبرة الخضرا ونضيف التقلاية للحراق بأصبعه نترك الوصفة ربع ساعة ونرفعها عن النار تسكب بصحن كيير وتزين بمكعبات الخبز المحمص والكزبرة والبصل المقرمش والرمان

02/10/2018

جاج مشوي بالفرن

التتبيلة : زيت زيتون ، ملح ، فلفل اسود ، ثوم بودرة ، سماق ، عصير ليمون ، زعتر ناشف ، رشة جوزة الطيب ، خل ، بتقدري تستخدمي لون بودرة لتعطي لون للجاج

نظفت الجاج وتبلته وحطيته بالثلاجة ساعتين بعدين حطيته بالفرن من فوق ومن تحت لمدة نص ساعة

17/09/2018

تنظيف الدجاج و سلقه

بطنجرة بحط شوية زيت زيتون و كركم و بضيف عليه بهارات صحيحة ( هيل ، قرنفل ، قرفة ، ورق غار ) بس تطلع ريحة البهارات بضيف قطع الجاج المنظفة مسبقاً و بقلب الجاجات مع الزيت بدون استخدام المعلقة ( التقليب عم طريق رج الطنجرة ) بس يتقلب مع البهارات بضيف مي مغلية و رشة ملح و حبة بصلة مقطعة اربع اجزاء لتشيل زفرة الجاج و بخليه عالسلق لمدة ٤٥ دقيقة حسب كمية و حجم قطع الجاج.

تنظيف الجاج : بغسله و بغمره بمي و بحط عليه شوية طحين و شوية زيت زيتون و شوية خل ، بخليه ربع ساعة بعدين برجع بغسله و بطبخه

12/09/2018

كانيلوني باللحمة

* تحضير اللحمة : نقلب بصلة مقطعة مربعات مع شوية زيت و زبدة لتذبل البصلة، بعدين نضيف اللحمة المفرومة و نقلب حتى يصير لون اللحم بني و تنشف ميتها و نتبلها بالقرفة + رشة هيل ناعم و ملح ،، و بس تستوي بتركها على جنب لتبرد

* الصلصلة : قلبت بصلة و شوية ثومة مهروسة بزيت وزبدة ، بعدين نزلت عليهم علبة صلصة طماطم + مكعب ماجي + حبتين بندورة مفرومة خشن + و نزلت عليهم عصير بندورة مفرزنته قبل بوقت و كوب مي + رشة ملح و تركتها تتسبك شوي و طفيت عليها

* البشاميل :٤ معالق طحين مع نص اصبع زبدة وكاستين حليب سائل وفلفل و مكعب ماجي و رشة جوزة الطيب

الطريقة : بنجيب معكرونة الكانيلوني و بنغمسها بماء دافي و بنطلعها من المي ،، ما بنسلقها ( حسب التعليمات المكتوبة على الباكيت ) ،، بعدين بنحشيها بحشوة اللحمة اللي عملناها و اهم شي الحشوة تكون باردة ..
بجاط البايركس بدهنه بشوية زيت و بحط طبقة من صلصة البندورة اللي عملناها ، بعدين برتب حبات الكانيلوني المحشية لحمة ، بعدين بنحط طبقة بشاميل عالكانيلوني و طبقة مكس احبان ( موزاريلا ، بارميزان ، شيدر ) بعدين كمان طبقة خفيفة من البشاميل و اخر شي جبنة
بنغطيها بقصدير و بندخلها عالفرن نص ساعة من فوق ومن تحت على ١٦٠ و اخر ٥ دقائق بنشيل القصدير و نحمر الوجه

11/09/2018

شوربة العدس

المكونات : ٣ معالق كبار زيت ذرة + ١ بصلة مفرومة + ١ فص ثوم مهروس + ١ كوب عدس مجروش + ٢ حبة جزر مقطع مكعبات + ١ بطاطا مقشرة و مقطعة مكعبات + ١ بندورة مقشرة و مقطعة + ٦ اكواب ماء مع مكعب ماجي + ربع معلقة فلفل اسود + معلقة صغيرة كمون + معلقة صغيرة ملح

الطريقة :
بطنجرة بنقلب البصلة و الثومة ليذبل البصل بعدين بنضيف العدس ، الجزر ، البطاطا ، البندورة ، و بنقلبهم شوي بعدين بنضيف الماء و الماجي و بنخليها على نار هادية تقريبا ٣٠ دقيقة لتصير الخضار مستوية و طرية
على مراحل بنبلش نطحن الشوربة بالخلاط لتصير ناعمة و بنرجعها عالطنجرة و بنزيد مي ازا احتاجت و اخر شي بنضيف الملح ، كمون ، فلفل اسود