29/05/2026
📌 تنبيه مهم للزبائن الكرام بخصوص نوع اللحمة وجودة الشوي:
احنا في المحل دايمًا بنحافظ على الأمانة، ولما الزبون يجيب لحمتو بنكتب عليها اسمو، وبنحطها بالدور، وكل واحد بياخد نفس لحمتو نفسها بدون أي تبديل أو خربطة.
هذا شغلنا ومبدأنا، وملتزمين فيه 100%.
لكن في نقطة مهمة لازم نوضحها للجميع:
كتير من الناس بتجيب لحمة من نوع موزة. وإحنا بننصح بكل احترام إنو الموزة ما بتزبط لا خرط ولا شوي، لأنها:
بتكون مجلّدة وصعبة بالمضغ
بتفقد طعمها على النار
إذا بردت بتصير زنخة
وما فيها دهنة كفاية عشان يمسك معها الكباب
ومع الضغط والشغل بتطلع شكلها وطعمتها مش بالمستوى المناسب، وهاد الشي بصراحة "بخزي" ومش من شغلنا، من نوع اللحمة نفسها
وكثير ناس من الزبائن بيطلبوا:
"اطحنها أحسن ما تخرب، لأنه مافي ثلاجات"
وإحنا – رغم إنو هذا الشي بضر بشغلنا – بنمشي برغبة الزبون، وبنعمل أقصى جهد عشان تطلع الطعم زاكي قدر الإمكان.
بس بالنهاية: مش كل اللحمة بتعطي نفس النتيجة مهما حاولنا.
والموضوع هذا مش عندنا بس…
هذا شكي موجود عند كل المطاعم، لأن المشكلة من نوع اللحمة مش من الشغل.
لذلك حبّيت أوضّح هالكلام بكل احترام،
ومنعذر من الجميع بسبب ضغط الشغل،
وإن شاء الله دايمًا نقدّم أفضل خدمة وأحسن طعم،
وبنضل نحاول قد ما بنقدر نرضي الكل… بس سبحان الله ما بنقدر نرضي الجميع.وفي النهاية، بنأكد إنو الزبون على راسنا، واحترامه وتقديره أهم من أي شي.
إحنا موجودين لخدمتكم، وبنبذل كل جهد ممكن عشان تطلع لحمتكم بأفضل طعم وأحسن جودة.
إذا صار أي ملاحظة أو مشكلة، الباب مفتوح، وإحنا بنرحب بالكلمة الطيبة وبنتعلم من كل رأي.
شكراً لإلكم على ثقتكم ودعمكم، ووجودكم هو اللي بخلينا نكمل ونقدّم الأفضل دايمًا.
الله يقدرنا ونكون عند حسن ظنكم. 🙏❤️
