11/03/2026
❤️❤️❤️❤️❤️
Nagpaathag makaron si Irene Casim, tag-iya it sangka gasolinahan sa Aklan, angot sa padayon nga pagsaka it presyo it produktong petrolyo ag kon ham-an mas mataas eon ro andang presyo kumpara sa mga daeagko nga kumpanya.
Sa sangka eksklusibong interview kay Casim, ginsaysay kara nga grabe man ro andang naaguman nga epekto bilang sangka "white station" ukon independent nga gasolinahan bangud naga-depende eamang sanda sa presyo nga ginapatuman it mga supplier ag owa sanda it kaugalingong depo.
Ginpabutyag nana nga nakibot imaw kat gulpi nga nag-taas ro presyo it andang gina-orderan ku nagtaliwan nga dominggo kon siin naga-abot eon sa Php 69 ro diesel halin sa supplier, rason nga napilitan sanda nga magpasaka man it presyo.
Gindugang pa nana nga mas ginaprayoridad it mga daeagkong kumpanya ro andang mga franchised stations, transport vehicles, ag mga mangunguma sa tunga it ginahambae nga krisis ag naganaba nga reserba it langis.
Bangud kara, nagapanawagan si Casim sa publiko nga indi sanda husgahan nga naga-hoard ukon nagatago it suplay bangud ro kapasidad eamang it andang tangke hay 20,000 liters suno sa ginatugot it Department of Environment and Natural Resources (DENR).
Ginklaro man nana nga owa sanda nagahingabot nga magpabug-at sa mga konsumidor kundi nagasunod eamang sanda sa daily movement it presyo agud makasalbar ro andang negosyo ag masuportahan ro andang mga empleyado.
Suno kay Casim, gina-imaw man nana ro panawagan it publiko sa gobyerno nga mapanaba ukon maduea ro excise tax sa petrolyo, kon siin ginatantiya nga naga-abot sa Php 10.00 kada litro ro manaba sa presyo kon matigayon daya, agud makabulig it mabahoe sa tanan.
