20/12/2025
I dag, laurdag 20. desember fyller Randi 60 år!
Sidan 2004 har Randi vore ein viktig del av kvardagen til ørstingar, voldingar og folk frå heile søre Sunnmøre. Gjennom åra – frå Fugl Føniks Kaffibar, via Fugl Føniks – Mat, Drikke & Bar, til dagens Føniks Kaffihus – har ho servert kaffi, espresso, cappuccino og det som måtte til for å få folk til å bli litt lenger – og kome att.
Føniks er forma av både Randi og Helge. Dei har bygd, utvikla og halde liv i bedrifta saman. Men i dag er det Randi sin dag. Ho som alltid er på, alltid har oversikt, og alltid ligg eitt steg føre. Full service-mode, 24/7. Pausar er meir eit forslag enn ein regel, og tempoet er stødig, uansett kor travelt det er.
For oss i familien er Randi ei klippe. Ho har ein sjeldan kombinasjon av kontroll og omsorg – og om noko ikkje er heilt på plass, så ordnar ho det, gjerne før nokon andre har oppdaga det. Verdiane i familiebedrifta kjem frå handling, ikkje frå fine ord, og Randi er sjølve beviset på det.
For kundane våre er ho eit kjent og kjært fjes. Ei som hugsar bestillingar, ser folk, og veit kven som treng ekstra kaffi, ekstra tid – eller berre eit smil. Mange har hatt Føniks som ein fast plass i kvardagen i over 20 år, og Randi er ein stor del av grunnen.
60 år, og framleis same gløden. Same engasjementet. Same hjartet.
Vi er utruleg stolte, djupt takksame – og ganske sikre på at Føniks ikkje hadde vore Føniks utan henne.
Gratulerer med dagen, Randi!
