18/05/2023
ရီးရဲလ်မက်ဒရစ်ကစားသမားတွေ ကွင်းထဲမှာဒီလောက်အထိ အသက်မဲ့နေတာကို တစ်ခါမှမမြင်ဖူးဘူး။ အထူးသဖြင့် ချန်ပီယံလိဂ်လိုပြိုင်ပွဲမျိုးမှာပေါ့။ ဟာလန်းက အပိုင်သုံးကြိမ်ရပေမယ့် သုံးကြိမ်စလုံး ကော်တွိုက်စ်ကလက်စွမ်းပြသွားခဲ့တယ်။ ကျန်တဲ့မက်ဒရစ်ကစားသမား ၁၀ ယောက်လုံးကတော့ ရုပ်ပျက်ဆင်းပျက်ပါပဲ။ နောက်တစ်ချက်ကတော့ ဝိန်းရွန်းနီရဲ့ပြောစကားက သွေးထွက်အောင်မှန်ခဲ့ပါတယ်။
ချန်ပီယံလိဂ်ဘုရင်ကို အများကြီးချိုးနှိမ်ပြီး မပြောချင်လို့ မန်စီးတီးကိုပဲ အသားပေးချီးကျူးချင်ပါတယ်။ အီတီဟတ်ကွင်းကလည်း အရင်လိုမဟုတ်...ပရိသတ်တွေရဲ့အသံက ကွင်းထဲမှာဟိန်းထွက်နေခဲ့တယ်။ မီလီတာအိုလို ငါကဆမ်ဘာသားလို့ သွေးနားထင်ရောက်နေတဲ့ ခံစစ်မှူးကို ဘယ်သူက ကမ္ဘာ့အဆင့်ကစားသမားပါလို့ သတ်မှတ်လိုက်တာလဲ?? ဒီပွဲမှာအတွေးလွန်ခဲ့တာ ဂွါဒီယိုလာမဟုတ်ဘူး။ အန်ဆယ်လော့တီပါ။ အတွေးလွန်နေလို့ ဒီပွဲမှာ မျက်ခုံးပင့်ချိန်တောင်မရလိုက်ဘဲ နောက်ဆုံးမှာ ခေါင်းပဲကုတ်နေခဲ့ရတယ်။ ဘာနာဒိုဆေးလ်ဗား၊ ဒီဘရိုင်း၊ ဂန်ဒိုဂန်၊ ဂရီးလစ်ရှ်ချ်တို့ရဲ့ လုပ်ချင်သလိုလုပ်နေတဲ့တွဲလုံးတွေအောက်မှာ ရီးရဲလ်ကွင်းလယ်နဲ့ခံစစ်က လည်စင်းပေးခဲ့ရတယ်။
မန်စီးတီးက ဘယ်နေရာမှာမှ ပြစ်ချက်ရှာမရခဲ့ဘူး။ ကြံဖန်အပြစ်တင်ရကြေးဆို စောစောစီးစီးဂိုးမရတဲ့အကြောင်းကိုပဲ အပြစ်ပြောချင်တယ်။ ဘောလုံးက မန်စီးတီးကစားသမားတွေရဲ့ခြေထောက်ထဲမှာပဲရှိနေပြီး ဘန်ဇီမာတို့တစ်သိုက် ဘောလုံးလိုချင်ရင်တော့ ဒိုင်လူကြီးဆီသွားပြီး နောက်တစ်လုံးလောက်ကွင်းထဲထည့်ပေးပါဗျာလို့ ပြောမှပဲရမယ့်အနေအထားအထိပဲ။
မက်ဒရစ်နောက်တန်းက ဟာလန်းကိုထိန်းချုပ်ဖို့ပဲ program ရေးထားပုံပါပဲ။ ကမ္ဘာ့ဖလားဆုရှင် ဝင်လာတော့ အသာတကြည်ပဲသွင်းဂိုးတစ်ဂိုး ထပ်ပြီးခွင့်ပြုခဲ့တယ်။ ဟာလန်းဂိုးမသွင်းရင်ပြီးရော...ကျန်တဲ့သူဘယ်သူသွင်းသွင်းဆိုတဲ့ ရည်ရွယ်ချက်နဲ့များ ကွင်းထဲဝင်လာကြသလား မသိပါဘူး။ ပြီးတော့ရီးရဲလ်မက်ဒရစ်က လူစားလဲလိုက်တိုင်း တစ်ခါလာလည်းအဆန်စီယို၊ တစ်ခါလာလည်းဗက်ဇ်ကေး၊ တစ်ခါလာလည်း စီဘယ်လ်လော့စ်နဲ့ ဒီလူပဲလှည့်သုံးနေရတာ တော်တော်ဆိုးပါတယ်။ ဒါတောင် ၅ ယောက်ပဲလူစားလဲခွင့်ပြုလို့ပါ။ ၆ ယောက်သာလဲခွင့်ပေးရင် ဝင်လာမယ့်ကစားသမားက နာချိုဖာနန်ဒက်ဇ်ဆိုတာ ကြိမ်းသေပါပဲ။
မန်စီးတီးက ဖလားသုံးလုံးရဲ့ လက်တစ်ကမ်းကိုရောက်လာပြီ။ မြို့ခံပြိုင်ဘက် ယူနိုက်တက်နဲ့ ဆာအဲလက်စ်ဖာဂူဆန်ကြီး ကိုယ်တိုင်ဖျော်ဖြေခဲ့တဲ့ ဖလားသုံးလုံးပြဇာတ်ကို ဂွါဒီယိုလာနဲ့အဖွဲ့သားများက ပြန်လည်ဖျော်ဖြေပြတော့မယ်။ အထူးတန်းကနေ ကြည့်ဖို့အတွက် အကုန်လုံးကိုကြိုတင်ပြင်ဆင်ထားစေချင်ပါတယ်...
