28/10/2020
ကျိုင်းတုံ ရှမ်းရိုးရာမုန့်တီ (ခေါ်) ခေါက်ဆင့်နမ့်ကျိမ်း လုပ်နည်း
*** ရိုးရှင်းသော ချက်နည်းကို ဖေါ်ပြထားတာပါ ***
၁။ ကျိုင်းတုံမုန့်တီခြောက် (အထုတ်ထဲကအညွန်းတိုင်း ပြုတ်ထားပါမယ်)
၂။ ဝက်သား/ အမဲသား နုပ်နုပ်စဉ်း (အဆီပါပေါင်သားအကောင်းဆုံး)
၃။ ဝက်ရိုး/ အမဲရိုး
၄။ ကြက်သွန်နီ
၅။ ခရမ်းချဉ်သီးမှည့်
၆။ ဆနွင်း
၇။ ရှမ်းပဲပုတ်ချပ် (ကင်ပြီးအမှုန့်ဖြစ်ထောင်းထားပါမယ်)
၈။ နှမ်းလှော်ထောင်း
၉။ ကြက်သွန်မိတ်+နံနံပင် (လှီးထားပါ)
၁၀။ ဂေါ်ဖီထုတ် (ပါးပါးလှီးထားပါ)
အသားအစိတ်သားဆိုရင် (၆)ပွဲစာလောက် စားလို့ ရပါတယ်။
🎈 ပြင်နည်း 🎈
အဆင့် (၁) အရိုးကို ဆားအနည်းငယ်ထည့်ပြီး ပွက်ပွက်ဆူတည်ထားပါမယ်။
အဆင့် (၂) အသားကို အသင့်နုတ်နုတ်စဉ်းကို ဝယ်သုံးလို့ရပါတယ်။
အဆင့် (၃) ကြက်သွန်နီ နဲ့ ခရမ်းချဉ်သီးမှည့်ကို နုပ်နုပ်စဉ်းထားပါမယ်။
** ကြက်သွန်နီ နုတ်နုတ်စဉ်းအသားနဲ့ဆတူ။
** ခရမ်းချဉ်သီး နုတ်နုတ်စဉ်းအသားနဲ့ဆတူ/နည်းနည်းပိုလို့ ရပါတယ်။
အဆင့် (၄) အနှစ်ဖြစ်အောင် ဆီစသတ်ပါမယ်။
** ဒယ်အိုးထဲ ဆီပူလာရင် ကြက်သွန်နီထည့်ပြီး ကြော်မယ်၊ ကြက်သွန်ရေဓါတ်နည်းနည်းခမ်းပြီး အဝါဖက်အရောင်သန်းပြီဆို ဆနွင်းမုန့်သင့်သလောက်ထည့်ပါမယ်၊ ပြီးရင်စဉ်းထားတဲ့ အသားကို ထည့်ကြော်ပါမယ်၊ (ဆား+အချိုမှုန့်ထည့်လို့ရပါပြီ) အသားကထွက်တဲ့အရည် ခမ်းစပြုရင် ခရမ်းချဉ်သီးထည့်ပြီး ဆက်ကြော်ပါမယ်။ ဆီတွေဝှေ့လာတဲ့ထိ ကြော်ရပါမယ်၊ ဆီဝါဝါလေးထွက်လာပြီဆိုရင် တည်ထားတဲ့ အရိုးအိုးထဲ အကုန်လောင်းထည့်၊ ကင်ပြီးထောင်းထားတဲ့ ပဲပုတ်မှုန့်ထည့်၊ ဟင်းရည်ကျကျဖြစ်အောင် (၂)နာရီလောက် မီးအေးအေးနဲ့ တည်ထားရပါမယ်။ အငံအပေါ့ကိုမြည်းကြည့်ပါ၊ လိုရင်ထပ်ထည့်ပါ၊ တည်ပြီးရင်တော့ စားဖို့အဆင်သင့်ပါပြီ။
မှတ်ချက်။ ဆနွင်း၊ ရှမ်းပဲပုတ်ချပ် ကောင်းမှ အရသာမှန်ပါမယ်။
⭐️ တည်ခင်းပုံ ⭐️
ရောင်းတန်းဆိုင်တွေမှာတော့ ဟင်းရည်အိုးကို အမြဲပွက်ပွက်ဆူနေအောင် ဖိုပေါ်တည်ထားရပါတယ်ရှင်။ စားသူလာတဲ့ချိန်မှ နူးညံ့တဲ့ မုန့်တီဖတ်ထည့်ထားတဲ့ ပန်းကန်ထဲ ဂေါ်ဖီ၊ ပဲရွက်ထည့် ဟင်းရည်ပွက်ပွက်ကို တစ်ပြန်နှစ်ပြန်လောင်းပြီးမှ အိုးထဲမှာ မြုပ်ထားတဲ့ အရိုးနဲ့အသားလေးတွေကို ဆယ်ထည့်ပေးပြီး ကြက်သွန်မြိတ်၊ နံနံပင်၊ နှမ်းထောင်း တွေကို အပေါ်ကဖြူးပြီး တည်ခင်းတာပါ။ အချဉ်ကြိုက်ရင်တော့ သံပုရာသီးညစ်ထည့်ပြီး စားလို့လည်းရပါတယ်။ ကျိုင်းတုံဝက်ခေါက်နဲ့လည်း တွဲစားကြပါသေးတယ်နော်။
ကျေးဇူးတင်ပါတယ်ရှင့်။
