28/08/2021
اليوم جا خويا الصغير باش افيقني من النعاس عيط عليا ماجاوبتوش عاود عيط والو حيد ليا المانطا أو حركني مزيان مافقتش.بدا كيجرني تابغيت ندور فيه على التبرزيط ديالو ولكن ماقديتش,شفت وجه صفار أو مشا عيطا على الوالدة نزلات عيات ماتفيق فيا و أنا جامد فبلاصتي أو هي تغوت,سمعاتها واحد الجارة ديما كتجي عندنا لدار دخلات كتجري فاش سمعاتها لقاتني مجبد. أو الوالدة كتبكي دارت يدها على قلبي تصدمات أو هي تقولهوم......مات,شداتني ضحكا و لاكين ماضحكتش أو ماعرفتش علاش ماقديتش نتحرك أو لا نهدر,ناضت روينا فدار,واحد الشوية جات لومبيلانص هزوني أو غطاو وجهي,فديك لحظة عرفت بلي مت ديال بصاح مافيهاش التخرشيش,جاتني عجب ماتيقتش,كيفاش؟؟غانتغيب ليوم على الحياة أو صحابي لي درت معاهم نخرجو بالعشية نديرو دويرة....مابقاتش ليا الوقت حتى فين نقول لمالين الدار لكود ديال البورطابل أو ديال الفايسبوك,شحال ديال الحوايج كنت بغا نديرهوم و الهدف ديالي لي كنت عايش غير باش نحققو كلشي مشا.بغيت نمشي عند البنت لي كانبغي و نقولها (بغيت تتزوج بك) أو نودعها مي مشا الحال. لغد ليه رجعوني لدار أو دخلوني لدوش أو هو ادخل عندي واحد الراجل سرحاني فوق واحد البارتيا,عاد عرفت بلي غايغسلني آخر تدويشة فحياتي.فاش سالا داروني فواحد لكفن بيض أو دخلوني لصالون لقيتو عامر بالناس,بانوليا صحابي .لأول مرة نشوف صاحبي #عبدو # متبت ماكايضحكش أو مغوبش.كلشي كيبكي أو كلشي مغوبش.شميت ريحت الموت كادو بيا واحد شويا بداو كايدوزو واحد بواحد شي كايعنقني أو شي كايبوسني على راسي تادازو كاملين عاد جات (الام ديالي) شدات ليا فيدي أو بداو الدموع كاينزلو من عينيها فديك اللحظة تمنيت غير دقيقة و حدة زايدة غير نقول ليها ماتبكيش أو نقول ليها سمحي ليا أو رضاي عليا راه رضاك غانحتاجو فديك لبلاصة لاش غادا. لموهيم نوضو (ميمة الحنينة) غير بزز من حدايا أو هوما إيهزوني أو دخلوني لديك طموبيلا ديال"نقل الأموات" أواه هادشي ولا بصاح , ديمارات أو شدو بيا الطريق لجامع لي حدانا, ليوم غاندخل ليه فتابوت بحال شي ميت!!صلاو العصر أو فاش سالاو سمعت لفقيه قاليهوم جنازة رجل أو هوما إينوضو باش ايصليو عليا, أو فصف لول بانو ليا ولاد سيكتور كاملين أو بانو ليا شحال من دراري من غير ولاد الدرب شي قرا معاي شي كانعرفهوم, كاملين جمعتهوم اليوم لصلا. صافي صلاو أو بدا لفقيه كايدعي ليا بالرحمة و المغفرة, أو فبلاصا هزوني عاوتاني لديك طوموبيلا أو شدو بيا الطريق لمقبرة,وصلنا نزلوني أو لقيت لقبر محفور!! مالهوم على هاد زربا . أنا ماسخيتش باصدقائي أو خوتي وعائلتي أو كاع لي عرفتهوم أو أكثر حاجة ماسخيتش بيها هي #ميمتي # ماسخيتش بلي عرفتها غاتبكي من قلبها على الموت ديالي ولاكين ماعندي ماندير, هزو ثابوت أو حطوني فديك لحفرة المظلمة ماخلاو ليا حتى البورطابل ديالي, أو الأول مرة نحسد صحابي حسدتهوم على الصلوات أو على الصيام لي غايزيدو من بعدي, بغيت نبكي ديك اللحظة بغيت نغوت نهرس ديك الثابوت مابغيتش نموت دابا مازال ماوجدت والو أشغانقول لدوك جوج لي غايوقفو عليا فاش تسد ديك لحفرة أشغانقول لله فاش أيسولني على حياتي فاش دوزتها أو وقتي فين ضيعتو, حياتي مشات تمنيت كون رجع ليفات, لاحو عليا التراب أو الشوك أورجعو فحالهوم بحال إلا عمرهوم عرفوني, بقيت بوحدي.... قصة غانعيشوها كاملين!فاعتبروا!! اللهم ارزقنا حسن الخاتمة
