17/08/2026
والله وصلنا لمرحلة حتى الكلام معاش قادر يوصف اللي نعيشوا فيه..
كل يوم نفيقو على مشكلة جديدة، وكل ما نحاولوا نوقفوا على رجلينا ونكملوا في رزقنا، نلقوا حاجة ثانية توقفنا.
صرفنا آلاف الدينارات على النافطة باش نقدروا نستمروا ونخدموا، وفي النهاية حتى هي استنفذت، والضيء قاطع بالساعات والأيام، والخدمة واقفة والمصاريف مستمرة.
إحنا كتجار مش طالبين المستحيل.. نبو بس نفتحوا أبواب رزقنا ونخدموا ونصرفوا على بيوتنا وموظفينا.
لكن كيف تقدر تخدم في ظل انقطاع ضيء يوصل لأكثر من 48 ساعة، والنافطة سعرها يضغط على كل صاحب مشروع؟
والأصعب من هذا كله إنك تشوف رزقك ومشروعك يتأثر يوم بعد يوم، وإنت عاجز حتى عن إنك تصلح الوضع بروحك.
بلاد فيها نفط.. ومعاش قادرين نوفروا أبسط أساسيات الحياة.
اعتبروها فضفضة من شخص تعب من كثرة المحاولة، لكن مازال يقول:
ربي يفرجها علينا، ويلطف بينا، ويعوض كل واحد تعب وخسر وصبر. 🤲�
