28/06/2025
Veislulist -Skútan fagnar 50 ára afmæli í dag þann 28.júní.
Frá stofnun fyrirtækisins árið 1975 hefur Veislulist þjónustað ótal veislur, viðburði, mötuneyti og samkomur af fagmennsku og alúð.
Í tilefni þessa merka áfanga vill fyrirtækið koma á framfæri innilegu þakklæti til allra viðskiptavina, samstarfsaðila og starfsfólks sem gert hefur þessa vegferð mögulega.
Í gegnum áratugina hefur Veislulist aðlagað sig breyttum tímum, tekið upp nýjar matreiðsluaðferðir og svarað kalli um sjálfbærni og fjölbreyttar matarþarfir. Fyrirtækið heldur þó fast í rætur sínar sem fjölskyldufyrirtæki, þar sem persónuleg tengsl við viðskiptavini skipta höfuðmáli.
Frá upphafi hefur fyrirtækið verið í eigu og rekstri sömu fjölskyldu. Birgir Pálsson matreiðslumeistari og Eygló Sigurliðadóttir stofnuðu fyrirtækið1975 og í dag sinna synir þeirra um reksturinn, Birgir Arnar, Sigurpáll Örn og Ómar Már, en einnig hafa makar, barnabörn og fólk í okkar nærumhverfi tekið virkan þátt í starfseminni á ýmsum tímum eða gera enn og viljum við þakka þeim öllum kærlega fyrir stuðninginn í gegnum árin.
Veislulist – Skútan var fyrst til húsa við Strandgötu í Hafnarfirði, þar sem Bókasafn Hafnarfjarðar er nú. Þar starfræktum við eitt vinsælasta skemmtihús bæjarins á árunum 1975–1982. Á staðnum var rekin veitingaþjónusta, kaffitería, veislueldhús og skemmtistaður. Fyrirtækið hét upphaflega Skiphóll, en síðar skiptist starfsemin í tvennt: Snekkjan, sem var skemmtistaðurinn, og Skútan, sem sá um veislu- og kaffiteríuþjónustu.
Árið 1982 var ákveðið að breyta rekstrinum enn frekar. Snekkjan var seld, en Skútan fluttist í Dalshraun. Þar var veisluþjónusta starfrækt áfram ásamt veislusal, og aukinn kraftur settur í matarbakkaþjónustu fyrir fyrirtæki, þjónustu sem þegar hafði verið sett á laggirnar í Strandgötunni. Í dag útvegum við fjölda fyrirtækja, heimaþjónustu og mötuneyta heitan hádegismat alla virka daga.
Árið 1992 flutti fyrirtækið í eigið húsnæði að Hólshrauni 3 þar sem við erum enn þann dag í dag og rekum ennþá alhliða kröftuga veisluþjónustu og matarþjónustu.
Fjölmargir matreiðslumenn hafa lært fag sitt hjá Veislulist og margir þeirra náð langt, bæði með hæstu einkunn í faginu og sumir í landsliði matreiðslumanna. Við erum stolt af þeim og þakklát fyrir að hafa átt hlutdeild í þeirra vegferð.
Þessi 50 ár hafa verið ótrúlegt ferðalag . Við erum þakklát fyrir traustið sem viðskiptavinir okkar hafa sýnt okkur í gegnum árin. Við þökkum einnig okkar frábæra starfsfólki sem leggur sig fram dag eftir dag til að tryggja að allt gangi upp.
Með kveðju, Birgir Palsson , Birgir Arnar Birgisson, Sigurpáll Birgisson , Ómar Már Birgisson og fjölskylda.
