19/05/2024
مقارنة بسيطة بين القهوة والكافية :
- اسمك بالكهوة يا باشا او يا اغاتي او تاج راسي او اسمك الحقيقي تسمعه من القلب مو يا استاذ المصطنعة الي تسمعها بالكافية .
- اتسافر وتغيب وترجع تلكاها منتظرتك .
- ما تلكه احد كاتب ( reservation ) ولا ممنوع تكعد على الميز لان محجوز .
- عادي اجيب اكل من برة الكهوة وتشرب وتحلي وادخن ولا واحد يحجي ويفتح حلكه ويكولك اشدسوي . بالعكس يقدم لك مياه معدنيه وابلاش .
- تتغير نفسيتك والمود والمزاج عال العال باقل الفلوس .
- تريد تكعد لوحدك او واحد وياك او تكعدون جماعه . من غير ما يتصفن بوجهك الـ ( waiters ) ويحير بزمانه بيكم .
- الكهوجي يحفظ ابدل الطلب ( ١٠ طلبات ) وبساع ( جاي . حامض . كاكاو . قهوة . جاي حليب ) وكل الطلب يوصلك مثل الورد ولا يتاخر عليك .
- الكهوجي عمره ما يغلط بالحساب ولا يكولك ( سوري يا استاذ) صاير غلط في الـ ( check ) .
- تحتويك لو عندك هموم الدنيا وتنسه وانت جاي تلعب ( طاولي . دومنه . ورق . شطرنج ) .
- محد من اصدقاءك يعترض عليها . لان الحب مو بالفلوس .
- تسمن لو تضعف . تغتني او تفتقر . هى مثل ما هي ثابته وصامدة في وجه التغيرات الزمنية .
- تلكي بصفها مطعم او محل مشاوي او فلافل تاكل منه وتتغذى ممكن اتنكنك ممكن تشبع .
- ما اتعزل من وقت ولا بيها ( last order ) يا استاذ الساعة ١١ ونص .
- بيها ناس تطلب على النوتة يعني بالدين وما بيها ( minimum charge ) .
- ابو الاركيله ابتسامته وشقاه للجميع رغم انه ما منتظر بقشيش وكت الدفع والحساب ما يكعد يدلغم بوجهك .
- الكهوة ما بيها تفرقة عنصرية ولا طبيقه كله جنب بعض ( الغني جنب الفقير . المحامي والدكتور والمهندس والباشا والافندي .
- كاعد ما مجتف وماخذ راحتك وملك زمانك . تطلب كرسى زيادة يجيلك كرسيين من تحت الارض .
- بيها هوسة الطاولي والدومنه واذا اكو لعبة فريقك المفضل ( ريال مدريد او برشلونة) متخلص من انفعال الجمهور وصوت الناس وضرب الخواشيك بالاستكاين بس كل هذا في تناغم غريب غير مزعج .
- واحلا تجمعات اتصير بيها ايام البطولات الكروية الكل متحضر وخصوصا بلعبات المنتخب الوطني ناس جايبه ابو المزيقه وناس جايبه صواني حلويات . وما احجيلك عن ايام رمضان بالكهوة الكل يعرف اشلون اتكون الاجواء بيها .
- مشاكل الدنيا تنحل بالكهوة وكعدات عرب وتصالح وجلسات الطرب والشعر والسياسين والمثقفين . الكهوة هي عالم ثاني ماكو منه . لا تستطيع البنات معرفته ولا يمكن شرحه لها . ودائما البقاء للقهوة معقل الرجال الاخير .
واخيرا وليس اخرا . والاهم من كل هذا اتحافظ على صلاتك وما اضيع اخرتك …
