Serchhip Sub-Hqrs YMA

30/04/2024

Ṭau thla, Tahrik 30, 2024 Thawhlehni:

SERCHHIP SUB-HEADQUARTERS YMA ROREL INKHAWM VAWI 4-NA NEIH A NI

Sub-Hqrs YMA, Serchhip Rorel inkhawm vawi 4-na, vawiin Dar 10:30 AM ah ṭanin Serchhip Auditorium-ah hun hman a ni. He hun hi President Pu Kawlṭhuama'n a kaihruai a, rorel palai 234 kalin, inlawmna thu, Vice President Pu PC. Vanlalluna'n sawiin, Secretary Pu K.Laltlanmawia leh Fin.Secy Pu H.Lalbiakhlua ten report an pe bawk.

He hunah hian k*m khat chhunga sum ₹11,40,800/- hmuh dan tur ruahmanna (Budget) pawm a ni a. Fa 10 nei Pu R. Siamkima, New Serchhip te nupa bakah, fa 7 ve ve neitu- Pu Lalchhuansanga, Hriangtlang Branch leh Pu K. Lalengkima, Chhingchhip Venglai te hnenah chawimawina hlan an ni bawk. Sub-Hqrs YMA huam chhunga member boral 270 sùnna hun hman a ni a, thi zinga 62 chu hmeichhia an ni. Rorel bul ṭan dawnah leh rorel kar lakah te Sub-Hqrs YMA Zaipawl leh mal zai te ngaithlain, Sub-Hqrs YMA Cultural Troupe ten lam hmuhnawm tak an entir bawk.

Rorel tura thu lût zinga YMA khawih 4 te chu pass vek a ni a. Sorkar khawih rel tur 7 lut zinga 6 chu pass a ni bawk. Palaite hian zanriah an kilho nghal a, zan lam hun hmang lovin Rorel Inkhawm vawi 4-na chu zanriah ei khamah a ṭiak ta a ni.

Rorel thu pass te:

YMA KHAWIH:

1) YMA Inkhawmpui Lian, Sub-Hqrs YMA Inkhawmpui leh Group YMA Inkhawmpui te hi
COVID hri len hma ami ang khân hman leh ni rawh se.

2) Ramngaw, tuihna leh nungcha humhalh kawngah Sub-Hqrs. YMA hian chak zawka hmalak ni
rawh se.

3) Tuihna humhalh kawngah Sub-Hqrs YMA-in tuihna humhalh ṭha Branch-te chawimawina lawmman pe ṭhin rawh se.

4) Branch YMA Chanchinbu enkawltute pualin Sub-Hqrs YMA hian Training buatsaih rawh se.

SAWRKAR KHAWIH:

1) Mizoram Youth Commission (MYC) Coaching Centre, Serchhip District-ah hawn a nih theih
nan Sub-Hqrs YMA-in hma la rawh se.

2) Chhiahtlang to Hmuifang (Via Lamchhip) kawng Black-top a nih theih nan Sub-Hqrs YMA-in
hma la rawh se.

3) Cadre Allocation Policy 2019 AGMUT Cadre-ah Mizoram Cadre hran kan neih ve theih nan
hma lak ni rawh se.

4) Raltlante tun aia khuahkhirha enkawl ni rawh se.

5) Sub-Hqrs. YMA-in ruihhlo ngaite enkawlna tur Home din ni rawh se.

6) Kikawn to Lungpho kawng Jeepable Road hi tun aia changtlung zawka siam a nih theih nan Sub-Hqrs YMA-in hma lak ni rawh se.

Issued by:
Media & Documentation Committee,
Serchhip Sub-Hqrs YMA

22/03/2024

Ni 21.3.2025, Ningani:

SUB-HQRS YMA ZAIPAWL MUSIC VIDEO TLANGZARH

March ni 21,2024, Ningani zan Dar 7:30 hian Serchhip Sub-Headquarters YMA Zaipawl te chuan an Music Video siam thar, 'Aw Zoram Nuam' tih chu Serchhip Sub-Hqrs YMA Conference Hall-ah mipuite ngaihthlak theih turin Pu PC. Vanlalluna, Vice President, Serchhip Sub-Hqrs YMA chuan a tlangzarh.

He Music Video tlangzarh inkhawm hi Zaipawl Committee Chairman, Pu F. Malsawmtluanga'n a kaihruai a, Tv. C. Lalneihkima, Secretary, Zaipawl Committee-in Zaipawl Committee-te hma lakna hrang hrang te sawiin, member-te inhmelhriattirna hun a hmang a. Pu Lalthanpuia, Zaipawl Convener hnen aṭangin he Music Video tlangzarh thei tura Zaipawlte an inbuatsaih dan ngaihthlak a ni bawk.
Video tlangzarhtu Pu PC Vanlalluna chuan Sub-Hqrs YMA Zaipawl te hi Zoram mipuite hriata Serchhip Sub-Hqrs YMA te min hlang kaitu an nih thu sawiin, hetiang taka Zaipawl ṭha nei thei tura Zaipawl Committee hruaitu te hmalakna chu fakin, Zaipawl Member-te inpekna ropui a tihzia thu leh Zaipawl Member nu leh pa te pawh an fa te, YMA tana hun an pek theih nana remchang an siamsak ṭhinnaah fakawm a tih thu a sawi bawk a ni.

Video thlirhona neih a ni a, zaithiam tak takte zai ngaihthlak niin, refreshment tuihnai tak nen kal khawm ten zan tum tawiin, Pu Zonunsanga Kawlni, Asst Secretary, Sub-Hqrs YMA, Zaipawl Committee-a OB In-charge ni bawkin lawmthu sawiin hun a khár ta a ni.

Zaipawl zai ngathla duh tan link-ah luh theih a ni e:
https://youtu.be/vX3OqTbqzrQ?si=uuEp_pynjV4indty

Issued by:
Media & Documentation Committee, Serchhip Sub-Hqrs YMA

Audio : Vintage RecordingVideo : Zozial Studio InnovationsHe video hi Channel dang atanga upload phal a ni lo. Upload lui kan awm a nih chuan Dan anga hma la...

19/03/2024

ILP DANBAWHCHHIATE ENDIK RUNPUI NEIH A NI.

Vau Thla, Tahrik 13, 2024: Nizan, March Ni 12,2024 (Thawhlehni) zana Central YMA leh Mizoram Police te ṭang dunin ruahmanna an siam angin; Serchhip Sub-Hqrs YMA hnuaia Kumpuan Committee te leh Serchhip Police te ṭang kawp chuan Serchhip Town Branch te leh Direct-a awp Branch hrang hrangah te ILP Check rùnpui neih a ni a. Branch pali huam chhungah ILP fel lo, a hnuaia mi ang hian hmuh chhuah a ni:

1) Chhiahtlang Kawn Veng - 2
2) S. Kawnpui North - 3
3) Bungtlang Bazar - 38
4) Bungtlang Khawnglung - 16

Bungtlang Bazar leh Khawnglung-a mi te hi Kram Company chhawr, ILP/Company ID Card nei lo te an ni.

Issued by:
Media & Documentation Committee, Sub-Headquarters YMA, Serchhip.*_

17/02/2024

GUARD ATANA LAK TE:

Ni 28.12.2023 khan Serchhip Sub-Hqrs YMA enkawl Entlang Social Forestry leh Sakhisih Sanctuary Guard tur lakna neih a ni.

Serchhip Sub-Hqrs YMA Office Bearer-te leh Chairman, Environment and Forest Protection Committee ten Guard hna diltute personal interview an neihpui hnu ah a hnuaia mite hi k*m khat (2024) atan lak an ni:

1. Entlang Social Forestry -
Pu R. Lalhuliana,
Vengchung, Serchhip
Phone - 9402141242

2. Sakhisih Sanctuary -
Pu Lawmhlira,
Ramthlun Veng, Serchhip
Phone - 9089831461

15/02/2024

Ramtuk thla Ni 15, 2024 (Ningani) Serchhip:

YMA HALL SAK MEK LEH ÊNTLANG FORESTRY TLAWH A NI

Serchhip Sub-Hqrs YMA O.B te leh Media & Documentation Committee ten YMA Hall sak mek leh Entlang Forestry-a Nagar Can Yojona Scheme hnuaia hnathawh mek an tlawh.

Nagar Van Yojana Scheme (City Forest) kalpuia hmalak mekna- Serchhip Sub-Headquarters YMA te enkawl, Serchhip dai Èntlâng Community Forest chu vawiin February ni 15, 2024 Ningani khan Sub-Hqrs YMA OB te leh Sub-Hqrs YMA hnuaia Media & Documentation Committee ten a hmunah an tlawh a. Nagar Van Yojona Scheme hnuaia hmalakna kal mek te hnathawktu te nen an enho a ni.

He hmun tlawhtu, Serchhip Sub-Hqrs YMA President Pu Kawlṭhuama leh a thawhpuite chu thawktu ten lo dawngsawngin, Nagar Van Yojana Sheme hnuaia hna an thawh dan hrang hrangte an lo hrilhfiah a. He hna thawktu leh enkawltu Pu Rongura Hrahsel chuan hna an thawh dan hrang hrangte sawiin, he hna thawhna tura sum awm zat chu Nuaih 132 a nih thu leh heta ṭang hian thing eng emaw zat phun belh tur a nih thu te, fur ruah tui luang ral tur khawlna tur pawh hmun ruk laiah siam tum a nih thu te, ruah tui dah khawlna tur siam te, kea kalna tur track siam te, Interpretation Centre sak te bakah Dil chunga lei dawh te chu an hna kalpui tur a nih thu a sawi a, Èntlâng Community Forest huam chin hung hna pawh zawh fel thuai a nih tur thu a sawi bawk.

He mi ni hian Sub-Hqrs YMA hruaitute leh Media & Documentation Committee-te chuan Social Welfare & Tribal Affairs Department Scheme aṭanga SYMA Community Centre building sak mek (Vertical extention) pawh a hmunah enin an tlawh nghal a, he building sak zawmna atana sum ruahman Rs. Nuai 98 aṭang hian SYMA chuan 1st leh 2nd Installment-ah cheng nuai 22.5 hmu tawhin, nuai 98 chu 4th Installment-a hmuh beisei a ni. Fur ruah tui tlak hma ngeia he hna hi zawh hman beisei a nih thu SYMA President, Pu Kawlṭhuama chuan a sawi a ni.

He inkawmhona hun hi Pu C. Lalhminghlua, Chairman, SYMA M&D Committee-in a kaihruai a, Pu Kawlṭhuama President SYMA Serchhip pawhin thu sawiin, kal khawm te aṭanga zawhna awmte chhán a ni bawk.

Issued by:
Media & Documentation Committee,
Sub-Headquarters YMA, Serchhip

28/08/2023

SERCHHIP SUB-HEADQUARTERS YMA-IN ṬANPUINA NUAI THUM A PE

Serchhip Sub-Hqrs YMA, SEC vawi 139-nain a rel angin, Manipur tualchhung buaina avanga harsatna tawk mek kan hnampui, Manipur State-a awmte ṭanpui nan Rs. 3,00,000.00/- pek a ni.

President, Pu Kawlṭhuama kaihhruaina hnuaia August ni 26, 2023, Inrinni-a Serchhip Sub-Hqrs YMA rorel ṭhukhawmin Manipur tualchhung buai avanga harsatna tawk kan unau, Zo hnahthlak te tanpuina tur, Serchhip Sub-Hqrs YMA hnuaia Branch hrang hrang ten an huam chhung ṭheuha Vehbur an khawn tling khawm aṭangin Rs. 3,00,000.00/- (Nuai thum) chu Manipur State chhunga he buaina tuartu kan unau te hnena pek a rel angin, vawiin, August ni 28, 2023, Thawhṭanni hian Mizoram Cooperative Apex Bank Serchhip Branch kal tlangin a hlan fel ta a ni.

Vehbur an khawn aṭanga an pawisa hmuh, Manipur State-a awmte ṭanpuina an thawn baka sum la awm aṭangin, he buaina avanga raltlan, an huam chhunga awm ṭanpui ngaite pawh a ṭul ang zela ṭanpuina pek Sub-Hqrs YMA chuan an tum a. Manipur-a zohnahthlakte ṭanpui nana phal taka thawhlawm thawhte chungah Sub-Hqrs YMA, Serchhip chuan lawmthu a sawi mawlh mawlh bawk a ni

Issued by:
Media & Documentation Committee, Serchhip Sub-Hqrs YMA

05/08/2023

YMA OFFICE SAK BELH ANI DAWN:

Thiṭinthla ni 5, 2023

Serchhip Sub- Hqrs YMA Office Cheng nuai 98 hmanga sak belh dan tur en fel a ni.

Directorate of Social Welfare and Tribal Affairs Dept. aṭangin Sub-headquarters YMA Office Building (Community Centre) Vertical Extension hna thawh nan Rs nuai 98 hmuh a ni a, heta ṭang hian Labour Cess 1% cut tur a ni.

He hna thawhna atan hian sawrkar k*m 2022-2023 atan ₹ 50,00,000.00 hmuh a ni a; sawrkar k*m 2023-2024 atan ₹48,00,000.00 hmuh leh tur a ni a. Hna thawk tur hian YMA Sub-Hqrs chuan mi dang dah lova anmahni dah tura a changtu Minister, Er. Lalrinawma hnena an ngenna chu Minister chuan pawmsakin, Sub-Hqrs YMA chu Work Agency ni turin a rawn tifel tawh a. An ngenna a tihhlawhtlinsak avang hian YMA hriaitute chu Er. Lalrinawma chungah hian an lawm takmeuh a, lawmthu sawina lehkha pawh an thawn tawh nghe nghe a ni.

Building sak chhunzawm hna thawh dan tur en hian nimin, August ni 4, 2023, Zirtawpni khan Pu Benhyafea Lalrinhlua, JE, Social Welfare and Tribal Affairs chu Serchhip Sub-Headquarters Office-ah a lokal a, SYMA OB-te leh Building and Property Committee ten lo dawngsawngin, Building Vertical Extension hnathawh dan tur an sawiho a, ṭha tak leh changtlung taka sak a nih theih nan ruahmanna thenkhat te an siam nghal a ni.

Issued by :
Media & Documentation Committee,
Serchhip Sub-Hqrs YMA, Serchhip

01/08/2023

WORKER cm DRIVER LAK FEL A NI.

August ni 1, 2023,
Serchhip Sub-Hqrs YMA

Sub-Headquarters YMA, Serchhip Executive Committee-in a lo rel tawh angin vawiin, August ni 1, 2023, Thawhlehni hian Serchhip Sub-Hqrs YMA Office-a thawk tur Worker cm Driver atan Vanlalawmpuia s/o C. Thanga, Chhekhnai Branch chu lâk niin, he mi ni vék hian a hna a zawm fel nghal.

Worker cm Driver atana lak, Vanlalawmpuia chu vawiin, August ni 1,2023, Thawhlehni hian Sub-Hqrs YMA Office Bearer-te leh Building & Property Committee ten Office-ah lo dawngsawngin; a hna thawh tur kalphung leh thil pawimawh dang inhrilhfiahna hun an lo hmanpui a, Sub-Hqrs lirthei kawl lai: Ambulance leh Morgue Van chabi, Pu P.C. Vanlalluna, Vice President, Sub-Hqrs YMA-in a hlan nghal bawk a ni.

Issued by:
Media & Documentation Committee, Sub-Headquarters YMA, Serchhip

04/04/2023

Serchhip Sub-Hqrs YMA
SCC THUCHHUAK:

Nimin, Ṭau thla, Tahrik ni 3, 2023 Thawhṭanni khan Serchhip Sub-Hqrs YMA rorelna sâng, Sub-Hqrs YMA Co-Ordination Committee Vawi 28-na chu President Pu Kawlṭhuama kaihhruaina hnuaiah, Serchhip Sub-Hqrs YMA Conference Hall-ah neih a ni a, Serchhip Sub-Hqrs YMA huam chhung aṭangin member 50 chuang an tel thei a ni.

Nimina SCC rorelah hian Ṭau thla, Tahrik ni 25-27, 2023-a Chhingchhip Venghlun Khelmuala Serchhip Sub-Hqrs YMA Inkhawmpui lo awm tura Agenda thlitfimna leh hruaitu thlan tura rawt chhuahte pawmna hun neih a ni.

He'ng te hi Inkhawm Pui Agenda atan pawm a ni:

1. YMA ten Mizoram Building & Other Construction Workers Welfare Board hnuaia inziak lut tura Labour Employment Skill Development and Entreprenuership Department te nena thawh hona kan neih hi en nawn ni rawh se.

2. The Mizoram (Land Revenue) Act, 2013, Tribal-in Non-Tribal hnena ram hralh leh pek khapna dan hi khauh taka hman a nih theih nan CYMA-in hma la rawh se.

3. Serchhip (Kikawn) to Sailam kawng siam ṭhat a, chei ṭhat a nih theih nan sawrkarah thlen ni rawh se.

4. Serchhip District Hospital-a a mamawh ten a thlawna kuang an hman theih nan SYMA-in hma la rawh se.

5. SYMA Office-a thawk tur Worker-cum-Driver lak ni rawh se.

SYMA NOMINATION THLITFIMNA:

He'ng a hnuaia mite hi k*m 2023-2025 hruaitu thlannaa thlan tur atan chhawp chhuah an ni:

1. Pu Kawlṭhuama,
Serchhip Kawnpui North Branch.

2. Pu Lalrammawia,
Serchhip Chanmari Branch

3. Pu PC. Vanlalluna,
Chhiahtlang Zotuithiang Branch

4. Pu K. Laltlanmawia,
Chhekhnai Branch.

5. Pu Zolianmawia,
Serchhip Vengchung Branch.

6. Pu R. Sanghmingthanga,
Chhekhnai Branch.

7. Pu R. Chalhmingliana,
Serchhip Kawnpui North Branch.

8. Pu Lalrinmawia,
Serchhip Chanmari Branch.

9. Pu Ramdinmawia Ralte,
New Serchhip Venglai Branch.

10. Pu Zonunsanga Kawlni,
Serchhip Chanmari Branch.

11. Pu H. Lalbiakhlua,
Serchhip Hmar Veng Branch.

12. Pu R. Lalhmunsiama,
Serchhip P&E Branch.

13. Pu C. Lalhminghlua,
Serchhip Chhim Veng Branch.

Meeting-ah hian Inkhawmpui Programme Committee aṭangin Programme an lo siam tawh dan tlangpui ngaihthlak a ni a, nghah deuh ngaite a la awm avanga an la zawh fel theih chiah rih loh thu dawn a ni.

Issued by:
Media & Documentation Committee,
Sub-Headquarters YMA, Serchhip.

16/02/2023

YMA AMBULANCE RATE

04/02/2023

THENTLANG BRANCH YMA KUMPUAN HAWNNA INKHAWM PU MAWITEA'N A HMANPUI.

February ni 2, 2023, Ningani zan khan Thentlang Branch YMA te chuan Darpawngi Hall, Thentlangah Kumpuan 'Ram leh Hnam Humhalh' hawnna inkhawm an nei a. He hun hi Pu Lalrammawia, Vice President, Serchhip Sub-Headquarters YMA chuan hmanpuiin, a hawnna hun a hmang a ni.

He inkhawmah hian Pu Mawitea chuan thu sawiin, "Mizo ṭhalai, ruihhloin a tihbuai loh, hri ṭha lo laka fihlim kan la tam tehlul nen tunlaia kan thu ngaihthlak tam takah erawh he mi kawnga Mizo ṭhalaite kan tlakchhiat nasat tawhzia thu kan hre zing hle. Mizo nula leh tlangval, Zo nun ze mawi chhawm nunga Mizo hnam chawimawitu tam tak kan la awm a, he'ng te hian min tiphur tharin ṭan min laktirtu ni mawlh teh se. Hnam rinawm, thingfaka kawngka kalh ṭhin kan nih reng laiin mi ṭhenkhat, ei ruk ching leh midang chan ai pawh lak hreh lo an lo awm ta. Hei hian kan hnam a timualpho a, ramin a tuar ṭhin a ni. He'ng hlemhlêtna leh eirukna sual lak aṭang hian tuma'n min chhan chhuak dawn lo va, keimahni, Mi huaisen Chawngbawla tuchhuan, Tlâwm ve ngai lo Ropuiliani thlah te hian keimahni leh keimahni kan inchhan chhuah a; hetiang thil ṭha lo leh ram leh hnam tichhetu sual hi kan do a, kan beih a ngai a ni," a ti.

A sawi zelnaah Pu Mawitea chuan, "Ram leh hnam humhalh tura kan chet velna kawng hrang hrang; hnam dang ILP Check te, ruihhlo do leh man te hi kan tih tur a nih reng laiin, hemi piah lamah kan chhehvela thil awm dang, nungcha leh kan ram thing leh mau te hi kan humhalh tur a ni a, kan lui tui kang mekte hi mut mawh hnar mawha kan neih a hun ta tak zet a ni," a ti bawk.

Pu Mawitea chuan, Mizo hnam kan ropui zual zel nan pian pun kan mamawh tih sawiin, keini, India ram State zinga mihring tlemna ber dawttu State te hi hnam dangin min zuam lutuk a hlauhawm a, kan thu leh hla an ngaipawimawh tâwk lovang tih a hlauhawm thu a sawi bawk.

SEC aṭanga amah zuitu Nl. F. Lalremruati'n kal khawm mipuite zaiin a awi reng bawk a, mipui lawm a hlawh hle.

Issued by:
Media & Documentation Committee,
Serchhip Sub-Hqrs YMA

18/01/2023

2023 Pawlkut thla ni 18

AMBULANCE HLAN:

National Highway Infrastructure Cooperation Limited(NHIDCL) hnuaia kawng laih hna thawk mektu pakhat Kram Infracon Pvt Ltd te chuan Serchhip Sub Hqrs YMA te hnenah Ambulance an hlan.

Nimin, January ni 17, 2023 Thawhlehni khan National Highway Infrastructure Corporation Limited(NHIDCL) hnuaia National Highway 54-na Pakage 2 (Baktawng leh Keitum inkar) double lane laih zauh hna thawk mektu pakhat Kram Infracon Pvt Ltd te chuan Corporate Social Responsibilty(CSR) Fund kaltlangin Serchhip Sub Hqrs YMA te kutah Ambulance (Maruti Ecco Van) thar an hlan.

Kram Infracon Company Base Camp, Thinghmun zawl, Chhiahtlang rama Ambulance hlanna inkhawm tawi hi Pu Dipesh Sharma, Director Kram chuan kaihhruaiin, he hunah hian CYMA General Secretary, Professor Lalnuntluanga chuan CYMA dinhmun leh hnathawh dan kalphung tlangpui report in, lawmthu a sawi a. He hun hmanpuitu Serchhip Bawrhsap Pi Nazuk Kumar pawhin NHIDCL hnuaiah kawng ṭha tak buatsaih chhoh mek a ni chu lawmthu sawiin, hun lokal zel turah hei hian Mizoram tan malsawmna a rawn ken tel a beisei thu leh he hun hlu taka a tel thei chu lawmthu a sawi bawk.

He hunah hian Kram Infracon Company-a hotu te, Serchhip Sub Hqrs YMA Executive Committee member te bakah thuthar lakhawmtute an tel a ni.

Issued by:

Media & Documentation Committee, Sub-Headquarters' YMA, Serchhip.