29/10/2019
COMPUTER STARTUP MUANG TIH REH DAN TLANGPUI
By Lalhriatpuia Lalhriatpuia on Sunday, 26 January 2014 at 15:44
I computer i ON-in windows a inhawng rang thin em? tih zawhna hi han inzawt ta ila, "kan lei tantirh kha chuan a in hawng rang a,mahse tunah chuan a muang tawh lutuk..." ti a chhang engzat tak awm ang maw? A dik a ni. Windows computer te hi a rei tulh tulh a,a muang tulh tulh mai zawng anih hi.Fragmentation nasa tak a siam a,temp file tam tak rawn awmin OS hawn ruala windows nena inhawng rual tur file a tam tulh tulh vangte a ni ber awm e.
Windows a inhawn tantir hi thil danglam han sawi tur a awm hranlo a,amaherawhchu hemi rual hian mita kan hmuh theih mai si loh program tam takin a rawn zui lut thin a ni tih hi hrelo tam tak kan awm awm e.Taskbar dinglam sir kilah i va en chuan program thenkhat chu i hmu thei ang.Windows a in run rual hian program tam tak,entirnan-Antivirus,usb security,printer software,skype,gtalk,etc.,te an lo che ve nghal a,hnathawk nghal thei tura inpeih sa an tum na lamah windows startup an timuang hle thin a ni.Application thenkhat te lah a hmasa bera run tumin tan an lo la ve bawk a,entirnan-Nero burning leh Adobe reader te thlengin tul miah silovin windows ruala lo inready ve te an lo tum thin a ni.Windows inhawn ruala loh theih loha inhawng ve thin application te chu awm ve bawk mah se,application tam tak hi chu startup-ah an awm kher hi a ngai hranlo mai ni lovin an hnawksak zawk thin a ni. Application chhuak thar apiang lo install-a hman chhin tum thin te tan startup a tihmuan phah thei a ni tih hriat a tha.Computer lei tan tirha second 30 vel chauh nghah ngai thin kha,a rei deuh hnuah minute 2 atanga minute 5 te thleng nghah a lo ngai ta thin a ni.
Windows startup a muanna chhan hi application te vang ngawr ngawr pawh a ni biklo thei.Virus,spyware,trojan,adware leh malware te hi windows startup rual hian tan an lo la ve thin a,an awm leh awm loh kan check/scan thin tur a ni.Windows startup ruala lo lut ve thin application te hi engte nge an nih kan en theihna hmun chu startup a ni a,startup kan check theihna tool chu windows-in a rawn ken tel nghal msconfig utility hi a ni.Msconfig hi a hman dan awlsam hle mah se computer siamtu te hian hmuh awlsam chuan an dah biklo a,hman sual palh theih a nih avangin an fimkhur ve a ni.Startup menu hnuai bera search box emaw windows logo leh R hmeh kawpa rawn chhuak Run box chhungah 'msconfig' tih chhut a,OK hmeh leh mai tur a ni.Msconfig hi fullscreen windows-ah kan en ve theilo a,startup ruala rawn zui tel ve application te information pawh hi chipchiar deuhin a dahlo bawk a ni.
Startup duh thala lo khawih kual vel thei tool chu autorun.exe a ni a,free a download theih mai a nih bakah fullscreen in i en thei bawk ang.Autoruns chhunga kan luh chuan startup item mal te te theuh kha an chanchin chipchiar takin kan hriat theih mai bakah OS inhawn ruala rawn tel ve program rualte,windows background a lo inhawng ve ringawt service te,kan duhthu a kan install program hrang hrang te an address leh nihna chiang tak maiin a rawn dah vek a ni.A tul reng vanga awm leh tangkaina nei lem lova lo awm ve program te kan thliar hrang ang a,a tangkai lo ho kha kan disable emaw malware te zawn chhuaha then fai emaw kan ti mai dawn a ni.Software thar kan install hma leh kan install hnua startup item te hriatchian theih chuan atha ber a,chumi atan chuan process explorer tih software hi a tangkai hle a ni.Startup item information chipchiar takin min hrilh thei a ni.Autorun.exe leh process explorer te hi www.sysinternal.com-ah free download theih a ni.
He software pahnih hi i download hnuah autoruns-ah khan right click la,run as administrator ah kal rawh.Windows nena kal kawp item hrang hrangte a rawn entir ang che a,a eng(yellow) a highlight te hi hard disk chhunga awm tawhlo file te tihna a nia,veilam kila box chhunga check(?) kha i uncheck emaw right click a delete hmeh emaw tih mai tur a ni.I thenfai hnuah chuan startup chu a lo rang sawt tawh mai ang.A chang chuan kan hriat chian mang loh item te windows boot tan a tangkai leh kai loh hriat hran a har thin a,chutiang item te chu right click-a Search Online tihah kal mai tur a ni.Internet-ah Online-a i awm erawh a ngai thung ang.Thil thar i install hmain startup list kha save sa la,list thar leh hlui i khaikhin ang a,engte nge danglam tih i thlir dawn nia.Autoruns-ah i lut phawt ang a,tichuan File > compare ah i kal ang.A rawng hring(Green)-a highlight te hi software install thar te an ni a ,i bel chiang bik dawn nia.A hring a tam hle chuan startup a timuang dawn a,uninstall then mai tur.Program pakhat install hian startup item-ah pakhat aia tam lo awm chang a awm thin a,hetiangah hian Green line phek hlai deuhin a dah thin a,heng program te hi install loh a tha ber.Program kan install tawh uninstall leh kan duhin,program-in a ken tel uninstall emaw,windows-in a chhawm ve(control panel)add or remove (program and features)atangin tih hram tur a ni,Folder va delete ve tawp hi tih loh hram tur.Folder va delete ve tawp mah la,registry ah file engemaw zatin awmhmun an lo khuar hman tawh thin a,windows an tih buai thin avangin registry cleaner tih software hmangin emaw your uninstaller te emaw hman hram a tha.
A tawp ber atan chuan Process explorer i hman dawnin startup list chhunga item pakhat(i rinhlelh)chungah right click la property window a rawn lang ang a,item eng ang nge a nih a lo verify ang.Malware a lo nih phei chuan a rawn sawi nghal ang a kill process tih kha click mai tur a ni...
See related links to what you are looking for.
