堅記咖啡

06/09/2019

不得不share嘅亞洲5️⃣0️⃣佳咖啡店list

當中嘅排名次序，就見仁見智吧🤷🏻‍♂️
但重點係，一次過幫你list out左50間出黎，research時間都慳返，你下次去旅行時唔係唔試下佢地有幾好嗎？

A Third Wave of coffee has been sweeping over Asia in the last decade. You'll now find some of the world's best coffee in Asia, hands down.

24/12/2017

Merry Christmas to Everyone!

03/12/2017

舊機退役，新機上場
現在還需要一些時間與新伙伴建立默契
假以時日，必將迎來更好嘅堅記咖啡

18/10/2017

拉花呢回事，你想拉得好，就有機會拉得好

飲開奶啡嘅人好容易會接觸到咖啡拉花，亦好容易因爲拉花圖案嘅美感而想學拉花。咖啡師用熟練嘅手勢將打熱左嘅奶輕鬆倒入咖啡之中，三兩下手勢就拉出一個個精緻美麗嘅圖案，成件事睇落好型好簡單，但背後嘅學問同功力，真係唔係嗰三兩下手勢可以反映晒出黎

咖啡拉花，我叫做學過原理，但真正叫做有所明白，都係靠不斷從身邊人或是instagram d video中觀察人地點拉，從練習中一路參透一路改進而慢慢上手，由拉到不知所謂抽象派嘅花開始，到開始睇到線條，到控制到圖案大小同位置，再可以掌握圖案嘅平衡同收筆嘅準確度，一步一步成為寫實派，真係無乜捷徑，就係不斷練習不斷練習

一星期拉5至10杯咖啡，算係基本練習吧，有日拉得太醜的話或者會拉多幾杯當補數，但練習用嘅咖啡我好少會拎黎飲，或者有人會覺得好浪費，但練習就係練習，如果杯杯都要飲晒，唔肥死都應該肚痛死，咁不如杯杯都認真咁拉，拉得靚嘅話，同杯啡影張相做個紀錄，都已經係對杯咖啡最好嘅尊重

易學難精嘅野，永遠都係引人入勝。拉花就係一種只要你想做好一點，就有機會做好一點嘅事情。或許其他事情都係咁，只要你背後不斷推動自己進步，你就會慢慢見到自己想要嘅結果

#拉花對啡客黎講係藝術對咖啡師黎講可能係娛樂
#個花拉得靚心情自然靚

29/09/2017

萬事起頭難，何況係做一個初哥咖啡師

踏出第一步去做一件事唔難，反而係要其他人相信你俾機會你去嘗試先至係難，所以我一直打從心底𥚃面感激第一間夠膽請我做咖啡師嘅咖啡店，令我可以踏踏實實咁去學做一個專業嘅咖啡師，放下自己作為消費者同外行人嘅無知，從商業、專業、咖啡文化等層面去了解香港咖啡業嘅美好同困難

雖然落鋪頭嘅日子唔多，打工嘅生活亦唔及想像中般如意，但在鋪實戰嘅每一分鐘，我都過得好開心，一路學習，一路偷師，繼而一路進步，一路成長，我慶幸自己決心行出黎打工，親手打開左咖啡世界無遠弗屆之大門

堅記咖啡嘅質素之所以見得下人呃到大家俾like，我喺鋪頭學有所成固然有莫大關係，但咖啡做得好唔好，技法、心法、態度、思考都係關鍵，要成為更高超嘅咖啡達人，我仲有好長嘅學習之路呢

他日大家喺不同嘅咖啡店見到小弟，鋪頭係咪叫堅記唔重要，最重要喺大家俾多d支持間鋪頭，買多幾杯咖啡，因為有你地嘅支持，咁鋪頭先可以繼續俾空間、機會、時間、資源去培育我成就更好更強嘅堅記

#為興趣打工最爽皮
#我打得工嘅鋪頭你認為仲會差得去邊
#多謝一直身體力行支持我嘅朋友

09/09/2017

😂😂😂😂我笑左好耐
日本人有時雖然誇張咁講一件事但又不失其真實性

咖啡名稱咁多種，有d仲係意大利文，唔識唔明又有咩出奇？
好似macchiato, piccolo, lungo, ristretto, affogato, dirty, bulletproof, irish coffee等等，就算識英文或意大利文，對唔飲開咖啡嘅人黎講全部等同外星文，夠膽叫都唔夠膽話人地整得唔好甚至整錯

不過唔識唔使介意，只要保持一顆好奇心，嘗試喺鋪頭叫d你唔知係乜嘅咖啡黎飲，或者叫之前問下google大神，好快你就會變成咖啡達人，落單自然得心應手

07/09/2017

～還覺得做一位咖啡師應該需要抱著一顆正能量的心，就好像如果咖啡師的心情和態度還差過上班一族，對每一位都釋放負能力，那就可能會令到整個地區的人都充滿負能量，所以咖啡師必須有正面積極的態度而有改變整個社區的神奇能力。～

Noddy(佢唔識我但我見過佢)所講嘅，正正係我覺得咖啡師應有嘅personality，做咖啡為自己帶黎快樂係首要，但更進一步，係要將呢份快樂傳遞俾其他人甚至一個社區

一間咖啡店好唔好，唔係齋係講d啡，當然你d啡唔好飲就咩都唔使講，但要令客人對你有印象甚至想返黎幫襯，我覺得一個笑容，一聲招呼，其實已經可以傳遞到好多正能量出去

咖啡店對做咖啡嘅人黎講可能只係一份職業，但對買咖啡嘅人黎講，絶對係一個想得到輕鬆、快樂、優閒、滿足嘅地方，如果香港有多d發放正能量嘅咖啡店，話唔定可以令香港變得更加美好

香港人在台灣人眼中都是拉花高手，有可能因為Artista Perfetto的出現，這一家咖啡店對大家來說可算是耳熟能詳，故他們在台北從2012開業到現在已經打出一片天，六位香港咖啡愛好者離開自己所熟悉的地方，到他人的地方創一番事業，如當日他們沒有到台北發展，可能在香港創業已一早失敗告終，因為物價高漲得不成正比，香港咖啡文化還未成熟，當時還是Starbucks，Pacific Coffee等連鎖店的天下，當時的決定果然是明智，而其中一員就是他— Noddy。

台灣與香港的分別在於，台灣那邊的咖啡行業比較團結，也不時會舉辦不少的公開活動，而大家也肯以平常謙卑之心去交流，就像一個大家庭，無分你我，他們就是在這種健康的環境下成長，當時的決定也是合理的。

「我覺得咖啡是人與人之間溝通的一個媒介，咖啡師和客人之間友誼，羈絆，甚至愛情，也是由咖啡建立出來的。我想做咖啡就是想用她來維繫每個人，還覺得做一位咖啡師應該需要抱著一顆正能量的心，就好像如果咖啡師的心情和態度還差過上班一族，對每一位都釋放負能力，那就可能會令到整個地區的人都充滿負能量，所以咖啡師必須有正面積極的態度而有改變整個社區的神奇能力。」

「了解客人所想要的口味比自己的口味更為重要，做到自己滿意的咖啡是基本，但做出獨一無二的客製咖啡才是更加出色。」

04/09/2017

有無諗過自己都可以成為一個咖啡師？

學咖啡可以因爲不同原因不同動機，年齡唔係問題，男女老少唔係問題，收入多少更加唔係問題(不過錢多緊係可以玩得高級d🤔)，唯一需要嘅，就係對咖啡嘅熱愛同執著

熱愛 ～～ 好簡單，好鍾意飲咖啡，但唔係只鍾意飲某一款咖啡(如果只係齋飲死星記、太平洋、老麥嘅咖啡其實你都唔算叫鍾意飲)，咩都想試，咩都想知，接受到咖啡唔只得一個味，腸胃幾唔受得都照飲，咁你就為之熱愛

執著 ～～ 即多方面嘅揀擇，知識層面上，你會想學晒所有專業上乘嘅咖啡沖煮方法；咖啡質素上，你只會揀阿拉比卡而唔揀羅布斯塔；咖啡店選擇上，你只會揀老遠那間有心做嘅小店都唔會揀樓下那間求戀期嘅連鎖店，諸如此類，總之就係對自己同對咖啡都有高度要求，就係所謂執著

具備以上兩個條件的話，恭喜你，你應該即時行動走去報個咖啡調配師證書課程，踏上成為一個專業咖啡師之路

但若然仲係猶豫不決，歡迎你黎堅記上一堂咖啡入門課，沖啡、打奶、拉花，你想學乜我就教乜，試下動手自己做，可能會認清自己嘅興趣同目標都未定

堅記並無公司註冊，絶無資歷認可，亦無一流設備，不過勝在有良心有善心，保證唔會hea教亂教，不成功不收費(收費？唔使驚，因為你都唔好自信到以為學一兩次你就會成功😂)，助你體驗咖啡嘅無窮樂趣，就係堅記嘅使命

已經有人喺堅記搵到咖啡嘅樂趣，你仲等咩？

#偽課程廣告

02/09/2017

堅記嘅用豆，大部份都唔係來自本地

因為東南亞黎講，新加坡、韓國、日本、台灣等地烘焙嘅豆，好多都做得比香港好，而且價錢仲要非常合理甚至平好多，歐洲等地就更加唔使講，所以自己一有機會出外旅遊，或知道有朋友外遊，買豆都係一件唔可以錯過嘅正經事

正因為咁，喺堅記所飲到嘅咖啡，嗰種滋味的確好難喺其他香港咖啡店飲得返，而呢個亦係堅記嘅賣點

不過老實講，本地都有一d好有誠意嘅咖啡店，除左品質仲會喺包裝上落功夫，雖然價錢徧貴就無可避免，不過如果味道係正嘅，貴些少其實都值得支持

多謝友人又送新豆俾我試，你荼毒我我荼毒你，就係咖啡嘅真諦