26/05/2026
帶眼識人 勸世文
--- 魚魚血淚史
今日想喺度同大家分享一個故事：
（長文慎入）
從前，有一條熟客魚考慮緊用一筆小資金，頂咗某間小店黎做，於是去搵咗一隻自認好識做生意嘅井底蛙問吓意見。點知井底蛙狂踩嗰間店冇得做，游說熟客魚不如用呢筆小資金同佢夾份開間舖，並搵埋井底蛙嘅朋友魚一齊夾份。兩條被井底蛙稱為「幸運兒」嘅魚魚，本身聽井底蛙講只係夾少少錢就可以一齊做老闆，熟客魚可以有份被動收入，朋友魚兩公婆更可以有兩份穩定工作，於是就開開心心咁一齊上咗呢條賊船啦。
點知，喺籌備開舖期間，根據井底蛙嘅要求同指揮下，魚魚們無奈夾左超出說好的預算三倍嘅金錢嚟開業。另外，本身講好由井底蛙老公做食品供應商，提供預製菜，所以朋友魚唔需要有高超廚藝都可以開檔做生意……點知係開業前夕，井底蛙話朋友魚能力不足搞唔掂，要安排有樓面經驗嘅井底蛙細佬同佢哋一個醒目嘅親信司機落去廚房做長工，盡享正式員工福利，而朋友魚兩公婆就突然被通知變成part-time，騎虎難下，一面無奈。
跟住一開業，好快就發生咗「有豐富對客經驗」嘅井底蛙細佬叫KOL唔好拍片，仲竟然同人講理由係驚生意太好…跟住井底蛙即刻喺網上同人隔空罵戰，幫舖頭收穫唔少haters，公司生意額亦即時插水式下跌。
有趣嘅係，每當舖頭有客人讚啲嘢好食嘅時候，井底蛙就會話因為佢地品牌有保證；但當有客人投訴嘅時候，井底蛙又會話因為唔係佢老公煮，所以啲嘢唔好食。生意好時就話係因為佢哋品牌，生意唔好嗰時就話因為魚魚唔做好宣傳……如此類推。
見到公司有問題嘅地方，熟客魚善意提醒，換來嘅係被井底蛙話唔識做生意，唔好喺度搞事；返舖頭幫手，就被背後話「7頭」返嚟呃人工； 聽佢哋講唔返，又被話乜都唔做扮老闆。朋友魚之前已被迫降做part-time，後來仲係咁被cut鐘，收入微薄，每晚收舖後仲會落樓洗碗；而冇夾錢嘅反而做長工，又一定要保障佢哋嘅工時以保障佢哋嘅收入，仲可以遲到早退，甚至話唔返就唔返。
井底蛙一家一直對外宣稱呢間鋪係佢哋嘅分店，有時又會話另外兩家魚魚喺度扮老闆。井底蛙老豆甚至周圍同啲客講，間鋪係井底蛙開嚟俾佢細佬打骰嘅。試問到底邊個先係扮老闆？
而井底蛙最大嘅興趣，就係講人壞話，平時最鍾意喺舖頭不停講其他食肆老闆嘅是非，踩低人哋餐廳同食物。後來冬天生意越嚟越差，魚魚提議喺生意最差嘅平日減少營業日，但井底蛙堅持要照開舖，去確保佢嘅長工同食品供應商有穩定收入。畢竟該供應商收入係按舖頭營業額超高比例抽成，如果唔開門佢就冇收入，所以話之你嗰日開門連額外嘅人工同電費都唔夠俾，但都要開，手法同倫敦金無異……
重點嚟啦！講到食品供應商，就不得不提佢所謂「全森林最抵嘅抽成優惠」，並多次強調係井底蛙先至可以俾咁抵價魚魚！但由於呢個超高抽成嘅百分比，魚魚們發現就算公司生意好嘅時候，公司俾完呢個佔營業額超高比例抽成嘅供應費之後，剩返嘅錢根本唔夠公司營運，公司仲要再負擔佢哋指定要求嘅兩個長工人工，結果即使未扣稅公司都要個個月蝕錢。
公司蝕錢當然就要節省開支啦！魚魚們認為食物供應商嘅抽成百分比超高，公司根本生存唔到，不停建議減低百分比或轉供應商；另外以公司嘅生意亦好難養到佢兩個長工，建議減省人手。但井底蛙全部反對，講明不能轉換供應商，不能炒佢嘅人。井底蛙反要求cut晒朋友魚嘅part-time工作，留返啲錢俾井底蛙細佬同親信返工。明明長工有最低工時保障同完善員工福利， part-time雖然係老闆但冇福利兼工時又彈性，魚魚們都不能理解及堅決反對。試問當初超支三倍都夾落去開鋪嘅錢，除咗為井底蛙一家提供就業機會同穩定抽成收入之外，魚魚們又得到過啲咩呢？原來3家人夾份開鋪，只有1家賺，2家一直蝕。
七個月過去，舖頭唔好話賺錢，就連出糧同支付各種雜費嘅錢都好勉強。再咁落去，執笠都係遲早嘅問題。魚魚甚至建議井底蛙回購魚魚們股份, 又或把鋪頭賣盤找人頂手。但幾個月嚟，無論向井底蛙嘅建議，投訴定談判一直都被佢以反駁隊隊長方式全部反對及謾罵收場。終於有一日，井底蛙突然喺舖頭自爆佢而家等住搞到舖頭執笠，佢就會接租返呢間舖，原址重開，免費食晒魚魚們夾左巨額投資嘅裝修，抽氣系統以及設備等等……朋友魚當場聽到又憤怒又心寒……去到呢日，魚魚們終於徹底明白呢個搵水魚夾錢開舖，然後透過超高抽成同放屋企人落嚟做長工吸乾公司嘅錢，吸到公司資不抵債嘅時候就迫公司執笠，最後承租返間舖黎食晒所有新裝修同設備嘅詐騙手法！
而家魚魚覺醒晒，唔再俾井底蛙情緒勒索，一齊攞返舖頭主導權，轉換供應商，目標只係想努力頂住舖頭唔執笠，唔俾井底蛙奸計得逞！而多間食肆嘅老闆得知魚魚情況後，竟然紛紛表示可以用平過井底蛙老公好多嘅價錢供貨俾魚魚，仲話咁正嘅價錢就算佢哋唔開舖，拉隊過嚟幫魚魚做都仲得，可想而知之前井底蛙嗰個「全森林最抵嘅抽成優惠」係有幾抵……
魚魚舖頭已經一貧如洗，只係苦苦支撐住唔想執笠俾人食咗間鋪，連廚師都唔敢請全職，怕舖頭隨時執笠，耽誤人哋家庭收入。只好搵盡心盡力但同樣被井底蛙背後講過無數壞話嘅廚師朋友喺假日嚟幫忙開鋪。其實井底蛙喺舊舖鍾意壓榨員工時薪，甚至話幫佢哋洗碗嘅阿姐係上流寄生族……而家魚魚舖頭結成受害者聯盟反抗，井底蛙竟然反過黎話係魚魚佢哋不守諾言，又話魚魚食左佢地間鋪，調轉晒啲嘢黎講，真正惡人先告狀！果然，當受害者反抗加害者嘅時候，錯嘅永遠都係受害者……
至於抄襲問題，其實，一隻井底蛙去到連壽司舖老闆嚟幫襯嗰時，都會話人哋係想抄襲自己先嚟。自大妄想症去到一個點，就算明明賣唔同嘅食物都可以話人抄。老實講，莫講話複製佢啲嘢食，魚魚恨不得同井底蛙品牌撇清任何關係就真。
故事講完啦，明白世界上有好多善良又單純嘅人，奉勸大家要帶眼識人。亦建議大家聽多啲唔同嘅人講，會理智啲同更容易得知事情嘅真相，減少受騙機會。願公義得以彰顯，祝大家平安~
