09/02/2026
Frótt er høvur á fullum maga
Fyritøkan Mál og Hondbóltssamband Føroya hava skrivað undir stuðulsavtalu fyri tey næstu tvey árini. Mál er við hesum millum annað at síggja á brókunum sum landsliðsleikararnir spæla dystir í. Fyritøkan framleiðir m.a. matpakkar og koyrir teir út á skúlar, og er matveitari til fleiri av tiltøkunum sum Hondbóltssambandi Føroya skipar.
Gunn Ellefsen, starvsnevndarforkvinna í HSF, og Christianna Joensen, stjóri í Mál, hittust herfyri Við Tjarnir, seinast kvinnulandsliðið var saman og vandi.
Heilsugóður kostur er umráðandi fyri øll ítróttarfólk. Tí er samstarvið millum Mál og Hondbóltssamband Føroya upplagt. Vit eru glað fyri at hava eina fjølbroytta samanseting av stuðlum, og Mál er við til at breiðka um hetta, sigur Gunn Ellefsen, starvsnevndarforkvinna í Hondbóltssambandi Føroya.
Christianna Joensen, stjóri í Mál, er fegin um at stuðla landsliðunum.
Vit í Mál leggja okkum eftir at veita heilsugóðan og fjølbroyttan kost, og tað samsvarar væl við tørvin hjá ítróttarfólki. Tað er ein heiður at stuðla føroysku hondbóltslandsliðunum og vera við til at skapa góðar karmar um teirra venjing og kappingar, sigur Christianna Joensen, stjóri í Mál.
