27/08/2026
وطنى❤️
مش بس مكان بيقدم اكل ، لا ده قصه كبيره من زمان ، من اول ما صاحبه المكان قررت تنزل السوق من ١٥ سنه و تتغلب على كل تحدياته ، و قررت ان المكان يبقى باب رزق للستات المجتهدين انهم يبقى عندهم فرصه للدخل و إثبات الذات ،
لحد ما بقى اكبر مكان فى الزقازيق للأكل البيتى على يد افضل شيفات محترفين ❤️
بنحب العملاء بتعتنا و ديما بنقدم اعلى قيمه بفضل الله و ده سر الاستمراريه 🙏
شكرا Nada Bassiouny ندى بسيوني
ماما الله يرحمها قالتلي لو عايزة تزودي مصروفك تنزلي في الورشة مع العمال "تلمي الجلد" اللي بيقع على الأرض غير كده مش هزود مصروفك ، تخيلوا واحدة بيزنس وومان بتكلم بنتها اللي مكملتش 10 سنين بالشكل ده وبتربي فيها المسئولية من وهى طفلة .
كنت بنت صاحبة المصنع وواقفة بلم الجلد من تحت رجلين العمال عشان أزود مصروفي .
لما كبرت جنب التمثيل عملت "بيزنس" تصدير برة مصر بفضل لم الجلود اللي خلاني أعرف أجيب الحاجة من مصدرها وأتفق مع التجار ومع المستوردين بتوع برة وأتحرك هنا وهناك وأنا مش خايفة بالعكس كنت بطور من نفسي .
مرة تانية طلبت منها أجيب طقم عجبني ، كان محل ملابس أطفال كبير عندنا في إسكندرية عند "محطة ترام رشدي" مباشرةً ، الإسكندرانية هما اللي هيعرفوه كان إسمه "Nadet" ، قالت للسواق يركن وإدتني فلوس ، قالتلي إنزلي إنتي إشتري بنفسك ، قلتلها مش هعرف ، قالتلي : لأ إنزلي وأنا موجودة لو معرفتيش إندهيلي .
نزلت من العربية دخلت المحل ، خرجتلها بطقمين مش طقم واحد وهى عارفة ان الفلوس ما تكملش غير طقم واحد ، قالتلي عملتي ايه ؟! جبتي اتنين إزاي ؟! قلتها البياعة عملتلي تخفيض عشان أنا صغيرة .
إتربيت على إحترام الست اللي بتشتغل مهما كان شغلها ، صغير أو كبير ، إن الست تشيل مسئولية نفسها أو بيتها وأسرتها دي حاجة عظيمة .
** تعالوا بقى نطلع على الشرقية عشان أحكيلكم حكاية (عزة الجميلة والبنات اللي معاها )
إللي في الصورة دي معايا نموذج رائع للست "الشرقاوية".
أيوة الست دي بنت محافظة الشرقية العظيمة وتحديداً "الزقازيق".
عزة حسانين غريب بدأت مشروع هدفه يجمع الستات يشتغلوا سوى ويكسبوا رزقهم بعرق جبينهم ، بدأت بمشروع صغير لتجهيز الأكل ، والمشروع كبر وبقى عندهم بوتاجازات حديثة وفريق كامل من أجمل الستات اللي بيعملوا المحمر والمشمر ونفسهم رائع .
أنا دوقت أكلهم بنفسي لما زرتهم في برنامجي رحلة ندى ، أجمل ستات في الشرقية كلها والزقازيق كلها ، ححطلكم صورتهم في التعليقات .
إن الست تبدأ مشروع مهما كان صغير ، دي حاجة عظيمة وتستاهل التحية والتقدير من القلب بجد .
لازم نربي بناتنا على تحمل المسئولية وإنهم ما يخافوش وننقلهم خبرات الحياه عشان يبقوا جامدين في وش تقلبات الحياه .
ويعرفوا إن الفلوس بتيجي "بالمجهود والتعب" وما يخلوش حاجة تبهرهم في الدنيا دي خالص ، والمعجزات ما بتجيش لحد نايم في سريره .
أجمل تحية لكل ست مصرية
