19/03/2026
بسم الله الرحمن الرحيم
لكل الناس اللي كانت بتدعمنا وبتسأل علينا 🤍
حابين نوضح الحقيقة بخصوص إغلاق عربية "إسلام كوفي"
تم نشر بيان من حي الشرق بيوضح إن الإزالة كانت بسبب إن العربية “مخالفة” وبتعطل حركة السير وبتشوّه المظهر الحضاري.
لكن الحقيقة اللي لازم تتقال:
عمرنا ما كنا سبب في تعطيل الطريق أو إزعاج أي حد، وكنا دايمًا ملتزمين بمكان وقوفنا بشكل لا يؤثر على حركة الناس أو السيارات، وكل أهل المنطقة يشهدوا بكده.
وكمان للتوضيح:
العربية كانت ركنة زي أي عربية مركونة بشكل طبيعي، ومكانها مكنش بيأثر على الطريق ولا على حركة السير.
كمان كنا حريصين على نظافة المكان وشكل العربية، وكنا بنسعى دايمًا نكون إضافة كويسة للمكان مش عبء عليه.
لكن اللي محيّر ناس كتير…
إن لحد دلوقتي فيه عربيات تانية شغالة عادي جدًا في نفس المكان ونفس الظروف، بينما إحنا وعدد بسيط غيرنا تم إيقافنا.
إحنا مش بنهاجم حد، ولا بنتهم حد…
بس بنقول إن لو في قرار، الطبيعي إنه يتطبق على الكل، مش ناس وناس.
وده مش اعتراض… قد ما هو طلب للعدل،
لأن ربنا سبحانه وتعالى لا يرضى بالظلم، وكلنا في الآخر بنطلب الحق مش أكتر.
وكمان للتوضيح الكامل:
العربية بعد ما تم التحفظ عليها راحت الحي، وفضلت موجودة لمدة 4 أيام، وبعد كده فوجئنا إن العربيات اختفت من قدام الحي، واتشالت عن طريق ونش.
والسؤال هنا: العربيات دي راحت فين؟!
وبالنسبة للكهرباء:
كنا بناخد كهرباء من بوكس تابع لشركة الكهرباء بشكل رسمي، ومش من عمود إنارة تابع للحي، وده لأننا عارفين كويس إن أعمدة الإنارة تابعة للحي ومينفعش استخدامها.
وكنا ملتزمين بدفع قيمة استهلاك الكهرباء بشكل منتظم، يعني مكنّاش بنسرق كهرباء بأي شكل
وفي النهاية:
الكلام اللي اتقال عن إننا بنعطل السير أو بنشوّه الشكل الحضاري غير دقيق، وده يشهد بيه كل حد اتعامل معانا أو شافنا على أرض الواقع.
