25/06/2026
نتفكر اول مرة تحلت لاباج جاتني نرجس قاتلي خدميلي ورود شكولا وانا كنت في بداياتي مول ماعنديش قتلها سمحيلي ماعنديش المول مانقدرش نخدملك كانت اول زبونة تأمن فيا ودير فيا ثقة شوية وعيطتلي قاتلي ابعتيلي خوك يدي المول شريتولك وخدميلي نخلعت في تصرفها وخدمتلها طبعا كانت الطلبية من عندي ماقدرتش نخلص منها وقتلها نعطيك دراهم المول مابغاتش وكانت اول طلبية نخدمها في مسيرتي لنرجس ومن داك الوقت وليتو تجو بالوحدة كل وحدة فيكم عندي معاها حكاية وكل وحدة فيكم طلبيتها كانت متميزة عن اختها و كيما عودتكم دايما كنت نجيبلكم الجديد لي يفرحكم و كنت نحاول دايما اني نكون عند حسن ظنكم ثلث سنين خدمة في مجال الحلويات تعلمت فيها بزاف بزاف بزاف صوالح و تعرفت على ناس خلاتني نبغي الخدمة هادي باش نقدر نمد فيها
راكم تقولو علاه راني نحكيلكم في هاد الحكاية طلبية عرس نرجس كانت اخر طلبية نخدمها بديت بيها و ختمت بيها مسيرتي البعض منكم يعرف السبب لي رح يخليني نحبس الخدمة هادي و لي هو ولله الحمد الذي بنعمته تتم الصالحات ربي كتبلي نبدا حياة جديدة مع من اختاره الله لي دعواتكم لي بالتوفيق و بالهنا ان شاء الله ❤️
سمحولي لكل وحدة ماكنتش عند حسن ظنها ولا خدمتلها خطرة حاجة و ماعجبتهاش واي وحدة درت معاها خصلة تدعيلي بالخير ربي يفرحني و يهنيني و يهني اي وحدة مقبلة على الزواج ولا تزوجت و عقبال لي مازالو ان شاء الله ❤️
الصفحة رح تبقا لزوجة اخي لي هي فالاصل كانت تاعها شجعوها باش تخدملكم لي كومند تاعكم بسك علمتها كلش و تعرف تخدم بالاك خير مني ❤️ شجعوها تبدا في هاد المجال رح تقرا تعليقاتكم راهي مترددة فالبداية
هادي هي لكل بداية نهاية و حات نهايتي في هاد المشوار
فرحانة كي فاتت عليا ثلث سنين في هاد المجال و كسبت خبرات و كسبت خواتات تاع الصح من بينهم نرجس حبيبتي ربي يهنيها ويسعد كل وحدة فيكم باسمها و بمقامها خدمت عندي طلبيتها و ماشي فرحانة في نفس الوقت كي راني رايحة نخليكم بصح شاءت الاقدار وفي هاد الدنيا كاين محطات و حان الوقت باش ننزل انا هنا ونخلي لي مورايا يكملو المشوار ❤️
انا رح نكمل المشوار لكن في مكان آخر و في زمان آخر وربما سنلتقي ….❤️
دمتم في رعاية الله و حفظه و اذكروني بدعوة بخير ❤️
Imene zel (imze)
