28/08/2022
أهم شيء هو أن تتذكر طعم الشعور الذي أحسست به :
طعم نهار لي تظلمت و حسيت روحك أضعف كائن فالدنيا ،
طعم نهار خيب إنسان الأمل تاعك و خلاك تحس بلي راك خالط فالمرتبة و القيمة لي عطيتهالو..
طعم الفشل و الهدرة السلبية لي تقالتلك و نتا تحاول بكل جهد ..
طعم التنمر و المعايبة لي تعرضتلها بلا مايكون عندك حتى ذنب ..
طعم الخيانة لي تعرضتلها من إنسان قريب ليك ..
طعم حتى التفاصيل الصغيرة كأن تكون في مجلس تحكي و يقص عليك واحد و واحد ما يقلك عاودلنا وش كنت تقول ،
تفكر الإحساس بكل موقف تعرضتلو ، ماشي باش تحقد و باش تنتقم ، لالا ، باش تحاول قدر المستطاع أنك ما تتسببش لإنسان أخر بهذيك المرارة ، لأنك تتفكر شعور التعرض لها ، و تولي تحاول تدير العكس و تخفف على كل إنسان تعرض لموقف أنت تعرفو شحال يقيس كأن تقول لهذاك لي قطعو عليه الهدرة : عاودلنا وش كنت تقول ؟
و تتحول من واحدة من أكبر المعاصي لي هي : الظلم ، لإحدى أكبر العبادات لي هي : جبر الخواطر ....
سقسيت مرة واحد : علاه جاي ناس ملاح بزاف ، قالي : بارسكو تحڨرت بزاف بالهدرة و الفعل في صغري ، و ذقت مرارة الظلم ، و مانيش حاب نكون سبب لإنسان آخر باش يحس بشعور كيما هذاك ..
التعرض لمواقف تولد ألم نفسي و مشاعر سلبية من الممكن جدا أن يجعلك إنسان بدون رحمة ، و لكن ممكن أيضا يحولك لجسد من الرحمة و الطيبة ، و تولي القاعدة : المحس بالألم ... لا يتسسب به ...
