31/03/2026
ЧЕХ ДЭХ МОНГОЛЧУУДЫН “ХАВРЫН БАЯР-2026” СПОРТЫН ТЭМЦЭЭНД 70 ГАРУЙ БАГИЙН 700-ААД ТАМИРЧИД ОРОЛЦЛОО
Чех улсад аж төрж буй монголчуудын уламжлалт “Хаврын баяр”-ын 28 дахь удаагийн спортын тэмцээн 2026 оны 3 дугаар сарын 27-29-ний өдрүүдэд Плзен хотноо амжилттай болж өндөрлөлөө.
Элчин сайд Д.Гансүх тэмцээнийг нээж, Европ дахь монголчуудын дундах спортын ууган тэмцээн болох “Хаврын баяр” жилээс жилд өргөжин тэлж, оролцож буй багууд, тамирчид, үзэгч хөгжөөн дэмжигчдийн хүсэн хүлээдэг хамгийн том тэмцээн, арга хэмжээ болсныг тэмдэглэж, Чех дэх Монголчуудын холбоо, ТББ, урлаг, спортын идэвхтнүүд, хувиараа бизнес эрхлэгчид болон иргэдийн төлөөлөл идэвхтэй дэмжин оролцож байгааг сайшаав. Тэрбээр иргэд хоорондын харилцаа нь улс орнуудын ард түмний харилцан ойлголцол, итгэлцлийг гүнзгийрүүлж, боловсрол, соёл урлаг, хүмүүнлэг зэрэг хамтын ажиллагааны бат бөх гүүр болж байгааг онцолж, иргэд энэ үүргээ сайн биелүүлж байгаад талархал илэрхийлэв.
Тэмцээний нээлтийн үеэр сонирхсон спортын төрлүүдээр амжилттай хичээллэж, болзол шалгуурыг хангасан болон, хамт олондоо манлайлал, үлгэр дууриалал болсон зарим тамирчныг холбогдох байгууллагуудаас спортын цол, зэрэг, МЗХ-ны “Тэргүүний залуу”, “Тамирчны алдар” тэмдгээр шагнасныг гардуулан өгч, баяр хүргэв.
Сагсан бөмбөг, волейбол, хөлбөмбөг, ширээний теннис, шатар гэсэн спортын 5 төрлөөр хурд, хүч, авхаалж самбаагаа сорин өрсөлдөж аваргуудаа тодрууллаа.
♟️Шатар: М.Өнөрбаяр алтан медаль, “Плзен” багийн Х.Угтахбаяр мөнгөн медаль авч, “Kooperativа” багийн Д.Түвшинсайхан хүрэл медалийн эзэд болцгоож, “Өсөх ирээдүйтэй хамгийн залуу” тамирчнаар “Уран мад” клубын шатарчин 7 настай Д.Сайнбаяр тодров.
🏓Ширээний теннис: Эрэгтэйчүүдээс “Cowboys” багийн Г.Пунцаг, “Foxconn” багийн О.Чингисхүү, “Mlada Boleslav” багийн З.Тэмүүлэн, эмэгтэйчүүдээс “Futaba” багийн С.Марал-Од, “Плзен” багийн Г.Болормаа, “Kooperativа” багийн У.Отгон-Эрдэнэ нар алт, мөнгө, хүрэл медаль хүртэв.
⚽️Хөлбөмбөгийн төрөлд 6 баг өрсөлдсөнөөс “Kooperativа” баг түрүүлж, “Mlada Boleslav” баг мөнгө, “Futaba” баг хүрэл медалийн эзэд боллоо. Тэмцээний мэргэн буучаар “Mlada Boleslav” багийн Д.Тэмүүлэн, шилдэг хамгаалагчаар “Kooperativа” багийн Г.Хонгор, шилдэг хаалгачаар “Kooperativа” багийн Г.Адъяасүрэн нар шалгарч, медаль, өргөмжлөл болон ивээн тэтгэгчийн гарын бэлгээр шагнуулав.
🏐Эрэгтэй волейболын төрөлд өрсөлдсөн 14 багаас “Kooperativа”, “UB agar”, “Foxconn Ugalz” багууд, эмэгтэй төрөлд өрсөлдсөн 16 багаас “Хийморь”, "Mlada Boleslav", “Foxconn” багууд тус тус эхний байруудад шалгарав. Волейболын шилдэг эмэгтэй холбогчоор “Хийморь” багийн Ш.Эрдэнэтуяа, шилдэг хамгаалагчаар “Foxconn” багийн Ө.Хишигсаран, шилдэг довтлогчоор “Хийморь” багийн Х.Солонго нар шалгарсан бол шилдэг эрэгтэй холбогчоор “UB agar” багийн О.Гантулга, шилдэг хамгаалагчаар “Kooperativа” багийн Б.Өсөхбаяр, шилдэг довтлогчоор “Kooperativа” багийн М.Төгөлдөр нар шалгарч, медаль, өргөмжлөл хүртэж, ивээн тэтгэгчид гарын бэлэг гардуулав.
🏀Эрэгтэй сагсан бөмбөгийн төрөлд өрсөлдсөн 24 багаас “Emust”, “Монгол”, “Kooperativa” багууд, эмэгтэй төрөлд өрсөлдсөн 11 багаас “Abydos”, " Mlada Boleslav", “Foxconn” багууд тус тус эхний гурван байранд шалгарлаа. Сагсан бөмбөгийн төрлийн эмэгтэйчүүдийн ангилалд шилдэг холбогчоор О.Мөнхзаяа, шилдэг хамгаалагчаар О.Даваадаш, шилдэг тоглогчоор Г.Оюунсүрэн нар шалгарсан бол эрэгтэйчүүдийн ангилалд шилдэг холбогчоор А.Сайнхүү, шилдэг хамгаалагчаар Б.Анар-Эрдэнэ, шилдэг тоглогчоор Т.Баярсайхан нар шалгарч, медаль, өргөмжлөл болон ивээн тэтгэгчийн гарын бэлгээр шагнагдав.
“Хаврын баяр” спортын тэмцээнд бүтэн багаараа буюу спортын 5 төрлөөр ЭСЯ-ны шилжин явах цомын төлөө 5 баг өрсөлдөж, бага онооны системээр ялагчийг тодруулахад 🥉“Foxconn” баг 32 оноогоор гуравдугаар байр, 🥈“Mlada Boleslav” баг 29 оноогоор хоёрдугаар байрт шалгарсан бол 🥇“Kooperativа” баг 26 оноогоор “Хаврын баяр” тэмцээний тэргүүн багаар шалгарч, ЭСЯ-ны шилжин явах цомын эзэн боллоо.
28 дахь удаагийн “Хаврын баяр” спортын тэмцээнийг ЭСЯ-тай хамтран зохион байгуулсан Хаврын баяр 2025 тэмцээний Цомын эзэн О.Баярбаатар ахлагчтай “Foxconn” багийн хамт олон, хамтран ажилласан болон ивээн тэтгэсэн Чех улсад суралцагч оюутан залуусын холбоо, “Monczech”, “Kooperativa”, “Gobi-Altai”, “UB”, “U mart”, “Mongolský spolek” Монголчуудын холбоо, “Join Up”, “iLease” зэрэг компани, хувь хүмүүст талархал илэрхийлж, ажил үйлсэд нь өндөр амжилт хүсье.
Өнөөдөр манай улсын 15000 шахам иргэн Чех улсад ажиллаж, амьдарч байна. 4000 шахам хүүхэд Чех улсад эцэг эхийн хамт аж төрж байгаагаас 2700 орчим нь цэцэрлэг сургуульд сурч, боловсорч байна.
Элчин сайд Монгол Улсаас Бүгд Найрамдах Чех Улсад ажиллах бүрэн эрхийн хугацаа нь дуусаж байгааг мэдээлж, Монгол, Чехийн харилцаа, хамтын ажиллагааг хөгжүүлэх, эх орон, өв соёлоо сурталчилж, түгээн дэлгэрүүлэх үйлсэд монголчуудынхаа дэмжлэг, туслалцааг авч, ойр дотно хамтран ажилласандаа баяртай байгаагаа илэрхийлж, талархал дэвшүүлэв.
“Хаврын баяр”-таа хүрэлцэн ирсэн хүмүүс багаа дэмжиж, уулзаж, танилцаж, үндэсний хоол, идээгээ зооглож, эвтэй найртай, баяр хөөрөөр дүүрэн байлаа. Хаврын баярт оролцсон бүх баг, тамирчид, олон зуун хөгжөөн дэмжигчдэдээ дахин талархал илэрхийлье.
Прага хот
