03/10/2026
تخيلوا الكيك القمر دى
كيك مقاس ١٦ دقيق سبونج جولدن باك
كريمة ريتشي لباني
كيك نص كريمة ونص تشوكليت
حشو كراميل ومكسرات
ب ٥٠٠ ج + سعر الحروف
الكلاينت كان عايز حاجة في حدود من ٣٠٠ ل٥٠٠ قولتله كيك الافراح لازم تكون كبيرة شوية عشان تبان فعملنا مقاس ١٦ وقولتله بتكفى من ٦ ل ٨ افراد بالكتيير اوي
الكيك اتطلبت قبل المناسبة باققل من يومين
والكلاينت كان مستغليها فعملت معاه واجب ومحاسبتوش على الحشوات ولا على النص التشوكليت ولا على الورد لاني بعد ما قولتله سعر الورد جيت اشتريه لقيته ازيد حوالي ١٢٠ جنيه عن السعر الي قولتهوله فقولت خلاص هشيله انا
وعملاله الحشوات على حسابي بردو عشان كان مزنوق في الوقت وكان مستغلي كل حاجة
وفي الاخر مكلمني بعد المناسبة بيقولي : ( الكيك صغيرة ومكفتش المعازيم !!!! ولما جينا نقطع و نوزع على الناس مكفتش وطعمها بلاستيك
وكانت مايلة شوية بس معرفش وارد تكون مالت منى انا مش منك انتي )
اولا هو مستلمها سليمة وزي الفل والبوكس شفاف وشافها
ثانيا انا في حلوان والفرح في المعادي وانا نبهت عليه من المسافة قالي لا متقلقيش قريبة
ونبهت عليه تتنقل في تكيف وتدخل على ثلاجة
لكن من الواضح غالبا ان كل دة محصلش وراحت القاعة مدخلتش ثلاجة لحد فقرة البوفيه يعني في الاغلب قعدت حوالي ساعتين برا الثلاجة فاكيد كانت ساحت ومالت
ثانيا معلش هو من امتى وكيك العروسة بنقطع ونوزع منها على المعازيم !!
يعني كيك ب ٥٠٠ جنيه تتقطع ويتوزع منها ع الناس ونلوم الشيف كمان انها مكفتش دة منطق !!
دة انت لو جبت دستة جاتوه هتبقى ب ٥٠٠ جنيه ومش هتكفى المعازيم بردو
طول عمر الكيك بتاعت العروسة بتبقى ليها هي والعريس
وكيك ب ٥٠٠ ج انا منبهة عليك انها بتكفى من ٦ ل ٨ افراد واخدها تقطع منها للمعازيم !!!
٥٠٠ جنيه اي دول الي يعملوا كيك تكفي معازيم الفرح !!😂
ثالثا يعني اي طعم بلاستيك مش فاهمة يعني مثلا لو قالي سكرها زيادة سكرها قليل خفيفة ثقيلة كنت هفهم لكن يعني اي بلاستيك دي
اي حد بيفهم في الخامات هيعرف ان الخامات الي انا كاتباها فوق دي اعلى خامات وهيكونوا عارفين طعمها عامل ازاي والكلاينتس بتوعي يشهدولى في موضوع الطعم دة
اصلا انا مكلفاها تكلفة تخليها تتباع ب ١٥٠٠ اقل حاجة واسألوا برا لكن انا مبحبش ازود على الناس
وانا اصلا مدخليش منها جنيه حرفيا وخسرانة فيها ودافعة من جيبي كمان
يعني الواحد لما يخدم حد ويكرمه ويشيل هو اغلب التكلفة قصاد بس ان الناس تفرح وتاكل حاجة كويسة يكون دة جزاءه !!
يلا الحمد لله والواحد بردو مش بيتعلم بالساهل ❤️
